BQO-da dári-dármekti zańsyz satýdyń 50-ge jýyq deregi anyqtaldy
ORAL. QazAqparat – Batys Qazaqstan oblysynda dári-dármekke qatysty zańsyz alypsatarlyqtyń 50-ge jýyq deregi anyqtaldy, dep habarlaıdy QazAqparat tilshisi.
BQO prokýratýrasy málim etkenindeı, Prezıdent tapsyrmasyna sáıkes óńirde quqyq qorǵaý jáne memlekettik organdarmen birlese otyryp, dárihanalarda, áleýmettik jelilerde zańbuzýshylyq derekterine qatysty monıtorıng jumystary júrgizilýde.
Osyǵan deıin 47 alypsatarlyq deregi anyqtalsa, sonyń 22-si farmatsevtıkalyq qyzmet jáne dárilik zattar aınalymy salasyndaǵy erejeni buzý, sonyń ishinde Qazaqstanda qoldanýǵa ruqsat etilmegen dárilik zattardy ótkizý, sondaı-aq baǵany shekten tys arttyrýǵa qatysty. 9-y zańsyz farmatsevtıkalyq qyzmetpen, úsheýi tıisti tirkeýsiz jáne ruqsatsyz kásipkerlikpen aınalysýǵa qatysty.
Mysaly, mobıldik top ınflıýtsıt preparatynyń 1 oramyn 3 myń teńgeden satý deregin anyqtady. Densaýlyq saqtaý mınıstrliginiń 2019 jylǵy 15 shildedegi buıryǵy boıynsha bul dárige 2 571 teńge mólsherinde shekti baǵa belgilengen. Osylaısha josyqsyz kásipker Oral qalasy aýmaǵynda dári-dármekti joǵary baǵamen satqan.
Taǵy bir farmatsevtıkalyq fırma Qazaqstanda qoldanýǵa ruqsat etilmegen ıngavarın dárisiniń 20 kapsýlasyn qala aýmaǵynda 17 270 teńgege ótkizgen.
Kúni búginge deıin 34 adam ákimshilik jaýapkershilikke tartyldy. Qalǵan ister sot pen taýarlar men kórsetiletin qyzmetterdiń sapasy men qaýipsizdigin baqylaý departamentinde qaralýda.
Sonymen qatar zańsyz aınalymnan alynǵan dári-dármekter men 561 mln astam teńgege baǵalanǵan jeke qorǵanys quraldary densaýlyq saqtaý organdaryna berildi.
Qazirgi ýaqytta mobıldik top jumysyn jalǵastyrýda. Dárilik zattardyń baǵasyn kóterý deregi bolsa, turǵyndar 8 (7112) 51-06-96 telefonyna habarlasa alady.
Eske sala keteıik, budan buryn Batys Qazaqstanda dári-dármek satýda zań talabyn buzǵandarǵa aıyppul salynǵanyn jazǵan bolatynbyz.
