BQO-da dári-dármekti zańsyz satqan turǵyn jaýapqa tartyldy
ORAL. QazAqparat – Memleket basshysynyń tapsyrmasyna sáıkes BQO prokýratýrasy quqyq qorǵaý jáne memlekettik organdarmen birlesip, dári-dármekpen alypsatarlyqty anyqtaý jáne kinálilerdi jaýapqa tartý baǵytynda jumys júrgizýde, dep habarlaıdy QazAqparat tilshisi.
BQO prokýratýrasynan túsken málimetke qaraǵanda, prokýratýra, ekonomıkalyq tergeý departamenti, polıtsııa departamenti qyzmetkerlerinen quralǵan jedel top dári-dármekti joǵary baǵamen satýdyń 7 jáne ruqsat qujattarynsyz ótkizýdiń 3 deregin anyqtady.
Atap aıtqanda, 8 shilde kúni ekonomıkalyq tergeý departamentiniń qyzmetkerleri jedel is-sharalar barysynda «Arbıdol» preparatynyń 1 oramyn 5 myń teńgeden satylǵanyn anyqtady. Densaýlyq saqtaý mınıstrliginiń 2019 jylǵy 15 shildedegi buıryǵymen atalǵan preparatqa 2312 teńge mólsherinde shekti baǵa belgilengen bolatyn.
Osylaısha josyqsyz kásipker Oral qalasy aýmaǵynda dári-dármekti 100 paıyz artyq baǵamen satqan.
Dárihana ıesine qatysty QR Ákimshilik quqyq buzý kodeksi 426-baby 1-bóligine sáıkes materıal toltyrylyp, ákimshilik jaýapkershilikke tartý úshin BQO taýarlar men qyzmetterdiń sapasy men qaýipsizdigin baqylaý departamentine berildi.
Sondaı-aq Ý. degen azamat Tsef-3 antıbıotıkterin ruqsat qujatsyz qaıta satyp, zańsyz farmatsevtıkalyq qyzmetpen aınalysqan. Bul azamat QR Ákimshilik quqyqbuzýshylyq kodeksi 424-baby 1-bóligine (zańsyz farmatsevtıkalyq qyzmet) sáıkes ákimshilik jaýapkershilikke tartyldy.
Eske sala keteıik, budan buryn BQO-da demalys kúnderi bazarlar qyzmeti toqtatylyp, avtobýstar júrmeıtinin jazǵan bolatynbyz.
