BQO-da dári-dármekpen qamtýda zańbuzýshylyqqa jol bergen 8 qyzmetker jaýapqa tartyldy
ORAL. KAZINFORM — Syrym aýdanynyń prokýratýrasy tegin medıtsınalyq kómek salasynda zańbuzýshylyqtarǵa jol berilgenin anyqtady.
BQO prokýratýrasynyń baspasóz qyzmetinen málim etkenindeı, tegin medıtsınalyq kómektiń kepildik berilgen kólemi aıasynda dárilik zattarmen qamtamasyz etý boıynsha aýdandyq aýrýhananyń qyzmeti tekserilgen.
Konstıtýtsııanyń 29-babyna sáıkes respýblıka azamattary zańda belgilengen medıtsınalyq kómektiń kepildik berilgen kólemin tegin alýǵa quqyly.
Alaıda tekserý barysynda dárilik zattardyń qajetti mólsherin esepteý algorıtminiń bolmaýy, preparattardy júıesiz jazý, merzimi ótken buıymdardyń bolýy, sondaı-aq adamdardy qajetti dári-dármektermen qamtamasyz etpeý derekteri anyqtaldy.
Mysaly, QR Densaýlyq saqtaý mınıstrliginiń 2021 jylǵy 20 tamyzdaǵy vedomstvolyq buıryǵynyń talaptary buzylyp, aýdanda esepte turmaıtyn 101 patsıent dári-dármekpen negizsiz qamtylǵan.
Sondaı-aq retseptiler úsh aıdan astam merzimge jazylǵan, bul Densaýlyq saqtaý mınıstrligi belgilegen retseptilerdi jazý, esepke alý jáne saqtaý erejesin buzý bolyp esepteledi. Aıtalyq, bir emdelýshige metaprednılon dárisi bir jylǵa taǵaıyndalǵan.
Dárilik zattardyń qajetti mólsherin esepteý boıynsha naqty algorıtmniń joqtyǵyna jáne patsıentterdiń naqty qajettilikteriniń nazarǵa alynbaýyna baılanysty 2024 jyly 1 800 dana mólsherinde ketotıfen dárilik preparatynyń qaldyqtary qalyp qoıǵan.
Sol sekildi aýrýhana ótken jyly revmatoıdty artrıt jáne oıyq jaraly kolıt dıagnozymen esepte turǵan 37 naýqasty tegin medıtsınalyq kómektiń kepildik berilgen kólemi aıasynda qamtamasyz etý úshin golımýmab preparatyna ótinim bermegen.
Budan basqa tekserý barysynda stomatologııalyq kabınette jaramdylyq merzimi ótken medıtsınalyq buıym, al operatsııalyq kabınette sáıkestik sertıfıkaty joq buıym tabyldy.
- Aýdan prokýratýrasymen atalǵan buzýshylyqtarǵa jol bergeni úshin aýrýhananyń 4 laýazymdy qyzmetkeri, sonyń ishinde basshysy 600 myń teńgeden astam somaǵa ákimshilik jaýapkershilikke tartyldy. Taǵy 4 qyzmetker tártiptik jaza aldy, - dep habarlady vedomstvodan.
Eske sala keteıik, budan buryn BQO-da balalardy tamaqtandyrý boıynsha 37 mln teńge turatyn 12 konkýrstyń kúshi joıylǵanyn jazǵan bolatynbyz.