BQO-da dán tıelgen bes vagon aýdarylyp qaldy
ORAL. QazAqparat – Batys Qazaqstan oblysynda dán tıelgen bes vagon aýdarylyp qaldy, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa 7 naýryz kúni saǵat 23.20-da Bókeı ordasy aýdany Saıqyn stansysynda boldy.
«Reseı temir joldary» AAQ Prıvolje temir joly fılıalynyń 1219-shaqyrymynda Saratov-Astrahan baǵytynda qatynaıtyn №10518 júk poıyzynyń bes vagony joldan shyǵyp ketken.
Zardap shekkender joq.
Apattyń oryn alýyna baılanysty jolaýshylar jáne júk poıyzdary basqa jolmen qatynaıtyn bolady.
Apatty joıýǵa «Reseı temir joldary» AAQ kúshteri (36 qyzmetker men Pallasov pen Basqunshaq stansalarynan 2 qalpyna keltirý poıyzdary keldi) jumyldyryldy.
Oqıǵa ornyna BQO TJ departamenti (4 qyzmetker, 1 tehnıka), aýdandyq polıtsııa bólimi (6 qyzmetker, 3 tehnıka), jergilikti atqarýshy organdar (5 qyzmetker, 2 tehnıka) bardy.
Aıta keteıik, Reseı temir joly Saıqyn stansysynyń ústimen ótedi.
