BQO-da dalada qalyp qoıǵan avtokólikter qutqarylýda
ORAL. QazAqparat – Batys Qazaqstan oblysynda dalada turyp qalǵan avtokólikterge kómek kórsetildi, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen túsken málimetke qaraǵanda, alǵashqy habarlama búgin saǵat 03.30-da túsken. «Saratov-Oral» tasjoly boıynda, Tasqala aýdany Mereı aýyly tusynda VAZ-2114 avtokóliginiń qar qursaýynda qalǵan.
Shaqyrtý ornyna jetken 15-órt sóndirý beketiniń qyzmetkerleri 23 jastaǵy jigitti jylytý ornyna jetkizdi.
Sondaı-aq saǵat 05.47-de Aqjaıyq aýdany Kónekketken aýyly tusynda Gazel avtokóliginiń turyp qalǵany jóninde málimet túsken. Jedel qutqarý jasaǵy 6-qutqarý bólimshesiniń qyzmetkerleri avtokólikti shyǵardy. Mashınanyń aqaýlyǵyna baılanysty júrgizýshi jylytý pýnktine jetkizildi.
Saǵat 09.27-de Tasqala aýdany Birlik aýyly mańynda Mitsubishi avtokóligi aýa raıynyń nasharlaýyna baılanysty isten shyqqan. 15-órt sóndirý beketiniń qyzmetkerleri 49 jáne 42 jastaǵy jolaýshylarǵa kómek kórsetip, olardy da jylytý pýnktine jetkizdi.
BQO TJ departamenti qys kezinde joldarda júrgizýshilerge qaýipsizdik sharalaryn qatań saqtaý kerektigin eske salady. Joldardyń jaǵdaıy týraly «Dármen» mobıldik qosymshasynan bilýge bolady. Qutqarýshylar kómegi qajet bolsa, 112 nómirine habarlasý kerek.
Eske sala keteıik, budan buryn BQO-da barlyq baǵyttaǵy joldar jabylǵanyn jazǵan bolatynbyz.
