BQO-da dala órtin sóndirip júrip kúıip qalǵan júrgizýshi aýrýhanaǵa tústi

ORAL. QazAqparat – Batys Qazaqstan oblysynda dala órtin sóndirý kezinde kúıik shalǵan 49 jastaǵy júrgizýshi aýrýhanaǵa tústi, dep habarlaıdy QazAqparat tilshisi.

Kaztalov aýdandyq aýrýhanasy dırektorynyń emdeý isi jónindegi orynbasary Ánýar Saparovtyń málim etkenindeı, oqıǵa 10 shilde kúni keshkisin Bolashaq aýyldyq okrýginde boldy.

«Jalyndy sóndirý kezinde kúıik jaraqatyn alǵan «Batys servıs plıýs» JShS órt sóndirý mashınasynyń júrgizýshisi saǵat 22.00-de aýrýhanaǵa jetkizildi. 49 jastaǵy júrgizýshiniń eki qoly, beli kúıgen. Qazirgi kezde jaǵdaıy ortasha aýyr. Barlyq kórsetkishteri qalypty, tolyq em qabyldap jatyr», - dedi Á.Saparov.

BQO TJ departamentiniń baspasóz qyzmetiniń naqtylaýynsha, oblystaǵy dala órtteriniń bári aýyzdyqtalǵan.

Sonyń ishinde Syrym aýdany Toǵanas aýyly mańynda 7 myń gektar aýmaqtaǵy qurǵaq shóptiń janýy 12 shilde kúni saǵat 09.00-de tolyq joıyldy.

Kaztalov aýdany Bolashaq aýyly mańyndaǵy tabıǵı órt (4 800 ga) 11 shilde kúni tańǵy saǵat 06.05-te sóndirildi.

Eske sala keteıik, budan buryn BQO-da órt sóndirýge aqtóbelikter men mınıstrlik tikushaǵy kómektesip jatqanyn jazǵan edik.