BQO-da dala órti aýylǵa qaýip tóndirdi
ORAL. QazAqparat - Aqjaıyq aýdanynyń Bazarsholan jáne Bazartóbe aýyldyq okrýgterinde órt boldy, dep habarlaıdy «QazAqparat» tilshisi.
BQO TJ departamentiniń baspasóz hatshysy Nurgúl Muqanovanyń aıtýynsha, Bazarsholan aýyldyq okrýgi aýmaǵynda qýraǵan shóptiń janyp jatqany jóninde 30 shilde kúni túski saǵat 12.30-da habar túsken. «Tilsiz jaýdy» aýyzdyqtaýǵa Oraldaǵy №18 órt sóndirý bóliminen bir tehnıka, 5 adam, sonymen qatar erikti órtke qarsy qurylymnan 3 tehnıka, 50 adam, orman sharýashylyǵy mekemesinen 2 tehnıka, 7 adam jumyldyrylǵan. Kúshti jeldiń áserinen uıtqı soqqan órt saldarynan bir traktor otqa oranǵan. Daladaǵy órt áli tolyqtaı sóndirilip bolǵan joq.
Aýyl turǵyndarynyń málim etkenindeı, órt Bazarsholannyń irgesine deıin kelgen. Abyroı bolǵanda, birlese qımyldaýdyń nátıjesinde aýyl ottan aman qaldy. Osy aýyldyq okrýgke qarasty Jamanqudyq eldi mekeniniń turǵyndary da túni boıy órtpen alysyp shyqqan.
Jeldiń baǵytymen órt Bazarsholannan Bazartóbe aýyldyq okrýgine aýysqan.
Bazartóbe aýyldyq okrýginiń ákimi Artýr Ermuqanovtyń aıtýynsha, jalpy órt Atyraý oblysy Inder aýdany jaǵynan kirgen. Bular Bazarsholanǵa kómekke bara jatqan mezgilde saǵat 14.30 shamasynda órtke jolshybaı kez bolǵan. Qatty órttiń saldarynan Bazartóbe aýyldyq okrýginiń shabyndyǵy men jaıylymdyq jerleriniń 60 paıyzy otqa oranǵan. Áıteýir mal-jan aman. Munda órt búgin tańǵy 04.00-der shamasynda sóndirilgen. Oǵan jańbyrdyń jaýýy da áser etken.
BQO TJ departamentinen túsken málimetke qaraǵanda, keshe sondaı-aq Qaztalov aýdany Taldyapan aýyldyq okrýginde dala órtenip, saǵat 21.00-de aýyzdyqtalǵan. Mundaǵy órt sharpyǵan aýmaq anyqtalý ústinde.
Eske sala keteıik, budan buryn jyl basynan beri óńirde jalpy aýmaǵy 15807 gektardy quraıtyn 187 dala órti tirkelgen bolatyn. Sondaı-aq 8,7 gektardy quraıtyn bir orman órti oryn aldy. Al ótken jyly osy merzimde jalpy aýmaǵy 1533 gektardy quraıtyn 89 tabıǵı janý oqıǵasy tirkelgen edi. ıAǵnı bıyl dala órti órship tur.
