BQO-da «Crown Batys» mal bordaqylaý kesheni qalpyna keltirilmek
ORAL. QazAqparat - Batys Qazaqstan oblysynda «Crown Batys» mal bordaqylaý keshenin qalpyna keltirý kózdelýde. Bul týraly búgin Astana ekonomıkalyq forýmynyń alańynda BQO ákimi Altaı Kólginov málim etti, dep habarlaıdy QazAqparat tilshisi.
BQO ákiminiń baspasóz qyzmetinen túsken málimetke qaraǵanda, QR Aýyl sharýashylyǵy mınıstrliginiń qoldaýymen ótken shara barysynda Batys Qazaqstandaǵy mal bordaqylaý orny men et kombınatyn jandandyrý boıynsha memorandýmǵa qol qoıyldy.
Qol qoıý rásimine A.Kólginovpen birge «Dunbia» kombınatynyń negizin qalaýshysy Robert Djon Dobson (Ulybrıtanııa), «QazAgro» ulttyq basqarýshy holdıngi» AQ basqarma tóraǵasy Nurlybek Malelov pen «Qazaqstan et odaǵy» JKZTB-nyń bas dırektory Maqsut Baqtybaev qatysty.
Kezdesý barysynda óńir basshysy aýyl sharýashylyǵy, ásirese, mal sharýashylyǵyn órkendetýde aımaqtyń áleýeti óte joǵary ekendigin atap ótti.
«Biz «Crown Batys» mal bordaqylaý keshenin qalpyna keltirý jumystarymen aınalysatyn bolamyz. Investor aımaqqa qarjy quıady, biz et jáne et ónimderi naryǵyn damytý men eksportqa shyǵarý úshin barlyq jaǵdaıdy jasaımyz», - dedi Altaı Kólginov.
