BQO-da COVID-19 juqtyrý eki esege azaıdy
NUR-SULTAN. QazAqparat – Batys Qazaqstan oblysynda COVID-19 juqtyrý deńgeıi azaıdy. Bul týraly óńir ákimi Ǵalı Esqalıev aıtyp berdi, dep habarlaıdy QazAqparat.
«Óńirdegi epıdemıologııalyq jaǵdaı jiti baqylaýda. Sońǵy aptada 658 juqtyrý faktisi anyqtaldy. Aldyńǵy aptamen salystyrǵanda naýqastar sany 9%-ǵa azaıdy. Oblystyń eki aı boıy qyzyl aımaqta ornalasqanyn eskere otyryp, aýdan turǵyndarynyń oblys ortalyǵyna kelýin azaıtý úshin 1 mamyrdan bastap 14 kún boıy Oral qalasy men qyzyl aımaqta ornalasqan 6 aýdan perımetri boıynsha blok beketter ornatyldy», - dedi Ǵ. Esqalıev Ortalyq kommýnıkatsııalar qyzmetinde ótken baspasóz máslıhatynda.
Ákimniń aıtýynsha, bul sharalar oblys ortalyǵyna turǵyndar aǵynyn 35%-ǵa azaıtýǵa jáne buqaralyq is-sharalardyń ótýine jol bermeýge kómektesken.
Nátıjesinde, sáýir aıynda aýrý kórsetkishi táýligine 200-250-den tirkelse, mamyr aıynda – 90-100 jaǵdaıǵa deıin tómendegen.
«Monıtorıng toptary 1 mamyrdan bastap 179 reıd júrgizdi, 965 nysan tekserildi. Joǵaryda atap ótkenimdeı, epıdemııanyń jappaı taralýyna jol bermeý úshin Úkimet birqatar shara qabyldady, sonyń arqasynda jaǵdaı baqylaýda ustap otyrmyz», - dedi Ǵ. Esqalıev.
