BQO-da bıýdjettik salada 33 qylmys tirkeldi

ORAL. QazAqparat  -  Batys Qazaqstan oblysynda bıyl bıýdjettik salada 33 qylmys tirkelip, keltirilgen shyǵyn 210 mln teńgeni qurady. Bul týraly óńirlik kommýnıkatsııalar qyzmeti alańynda BQO Memlekettik kirister departamenti basshysynyń orynbasary Temirlan Shońaev málim etti, dep habarlaıdy QazAqparat tilshisi.

Onyń aıtýynsha, sonyń ishinde toǵyz aıda «Jumyspen qamtýdyń jol kartasy - 2020» baǵdarlamasy boıynsha 8, «Agrobıznes - 2020» boıynsha 7 qylmys tirkelgen.

Ekonomıkalyq tergeý qyzmeti óndirisinde 9 aı ishinde 162 qylmystyq iske tergeý júrgizildi.

«Qabyldanǵan sharalar sotqa deıingi tergeý sapasyn barynsha jaqsartýǵa múmkindik berdi, tirkelgen isterdiń 60 paıyzy aıaqtaldy (98 qylmystyq quqyqbuzýshylyq sotqa joldandy jáne aıaqtalmaǵan negizde qysqartyldy). Aıaqtalǵan qylmystyq ister boıynsha keltirilgen shyǵyn kólemi 2 mlrd teńgeden asyp, sonyń 1,5 mlrd teńgesi óndirildi. Jalpy somasy 500 mln teńge bolatyn múlikke tyıym salyndy», - dedi T.Shońaev.

100 mln astam salyq tóleýden jaltarǵandarǵa qatysty qylmystyq is sotqa joldandy. Oral qalalyq sotynyń úkimimen basshy shartty túrde 5 jylǵa bas bostandyǵynan aıyrý jazasyna kesildi.

Sonymen qatar 20-dan astam zańsyz qumar oıynyna qatysty  uıymdary anyqtaldy. 10 qylmystyq istiń jeteýi boıynsha uıymdastyrýshylar qylmystyq jaýapkershilikke tartyldy. Kóptegen tehnıkalar, sonyń ishinde oıyn avtomattary tárkilendi.

Oblystyq Іshki ister departamentimen birlesip aktsızdik markasy joq 5 mln astam sheteldik temeki saqtalǵan qoımalar áshkerelendi. Bulardyń zańdylyǵyn kórsetetin qujattar bolmady.

Atalǵan derek boıynsha QR QK 214-baby 1-bóligine sáıkes qylmystyq is qozǵaldy. Osyndaı sharalar barysynda Oral men Aqsaı qalalary aýmaǵynda 14 mln astam temeki ónimderi tárkilendi.

Temirlan Shońaev sózine qaraǵanda, sotqa deıingi tergeýdi júrgizý barysynda keden shekarasy, atap aıtqanda, Aqtaý qalasyndaǵy «MORPORT» keden beketi arqyly jalpy somasy 4,8 mlrd teńgeniń temeki ónimderin jalǵan qujattar men anyq emes málimetter kórsetilgen deklaratsııalardy paıdalaný arqyly ótkizýge qatysty oqıǵa anyqtaldy.

«Atalǵan derek boıynsha QR QK 234-baby 3-bóligine (ekonomıkalyq kontrabanda) sáıkes qylmystyq is qozǵalyp, ol tergeý úshin ortalyq apparatqa jiberildi», - dedi T.Shońaev.