BQO-da búırek sındromdy gemorragııalyq qyzbaǵa shaldyqqandar sany 1,7 esege ósti

ORAL. KAZINFORM — Batys Qazaqstan oblysynda 2025 jyly 47 adamnyń búırek sındromdy gemorragııalyq qyzba dertine shaldyqqany tirkeldi.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, bul 2024 jylmen salystyrǵanda, 1,7 esege kóp.

Onyń sózine qaraǵanda, juqpaly aýrýmen syrqattanǵandar sany jyl sanap ósip kele jatqany baıqalady. Atap aıtqanda, 2023 jyly — 3, 2024 jyly 27 adam aýyrǵan.

— Oral obaǵa qarsy kúres stantsııasynyń mamandarynyń jyl saıynǵa júrgizgen zertteýlerine sáıkes búırek sındromdy gemorragııalyq qyzbany taratýshy kemirgishterdiń biri — jıren toqaltister belsendiligi tamyz aıynyń ekinshi jartysynan bastap artyp, onyń aýrý juqtyrý qaýpi joǵarylaıdy. Sonymen qatar atalmysh derttiń ósýi Jaıyq ózeni jaıylymdaryna jıdek terý, sańyraýqulaq jınaý, pishen, aǵash daıyndaý, ań jáne balyq aýlaýǵa baratyn adamdar sanynyń kóbeıýine baılanysty bolýy múmkin, — deıdi N.Mustaev.

Onyń aıtýynsha, adamdar aýrýdy negizinen turmystyq jaǵdaıda, aýyldaǵy jáne jeke sektordaǵy qurylystarda bolǵan kezde, sondaı-aq aýyl sharýashylyǵy jumystaryn júrgizgende, orman alqaptarynda nemese olarǵa tikeleı jaqyn ornalasqan aýmaqtarda juqtyrady.

— Munyń aldyn alý úshin shóp, bıdaı, astyq ónimderimen jumys jasaǵan kezde jáne kemirgishter bolýy múmkin shańdy bólmelerde respırator qoldaný kerek. Sonymen qatar kemirgishtermen lastanǵan bolýy múmkin ónimderdi qoldanbaý, jeke bas gıgıenasyn saqtaý mańyzdy. Eldi mekenderde kemirgishterge qarsy deratızatsııalyq jumystardy júrgizý de qajet. Dertti juqtyrǵan adamdar negizinen juqpaly aýrýlar aýrýhanasynda emdeledi, — dedi departament basshysynyń orynbasary.

Eske sala keteıik, budan buryn BQO-da aýyz sý men tamaq ónimderinen sáıkessizdikter anyqtalǵanyn jazǵan edik.