BQO-da búırek sındromdy gemorragııalyq qyzba aýrýyna shaldyqqandar sany kóbeıdi

ORAL. KAZINFORM – Batys Qazaqstan oblysynda jyl basynan beri 12 adamnyń búırek sındromdy gemorragııalyq qyzba aýrýyna shaldyqqany anyqtaldy.  

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, ótken jyly bes aıda óńirde bul dert tirkelmegen edi. 

Nurlybek Ermekulynyń sózine qaraǵanda, bıyl sonyń eki deregi Báıterek, jeteýi Bórli aýdanynda, úsheýi Oral qalasynda tirkeldi. 

– Bul aýrý tyshqan tárizdi kemirgishterden juǵady. Onymen syrqattanǵandar juqpaly aýrýlar aýrýhanasynda búırek jáne basqa dene múshelerin emdetedi. Biraq adamdardyń bir-birine juqpaıdy, - deıdi departament basshysynyń orynbasary.

Onyń aıtýynsha, adamdar negizinen bul dertpen qazan, qarasha, jeltoqsan aılarynda aýyrady. Mysaly, ótken jyly kúz-qys aılarynda 27 derek tirkeldi. Al 2023 jyly tek úsh adam ǵana syrqattanǵan edi. Bul óńirde turǵyndardyń búırek sındromdy gemorragııalyq qyzba aýrýyna shaldyǵý kórsetkishiniń ósip kele jatqanyn kórsetedi. 

Maman atalmysh aýrýdyń aldyn alý úshin kemirgishter bolýy múmkin jerlerde saqtyq sharalaryn umytpaý kerektigin eske saldy.

Aıta keteıik, budan buryn BQO-da aýrý taratatyn tyshqan tárizdi kemirgishter sany 10 ese óskenin jazǵan bolatynbyz.