BQO-da buryn isti bolǵan 8 adam jazǵy lagerge jumysqa turǵysy kelgen
ORAL. KAZINFORM — Batys Qazaqstan oblysynda bilim basqarmasynyń málimetine sáıkes túrli baǵyttaǵy 532 balalar demalys jáne saýyqtyrý ortalyǵy jumys isteıdi. Sonyń ishinde 16-sy qala syrtyndaǵy, 509-y mektep janyndaǵy, sondaı-aq jeteýi shatyrly lager.
BQO polıtsııa departamenti qoǵamdyq qaýipsizdik basqarmasynyń bastyǵy, polıtsııa podpolkovnıgi Oljas Ibraıymovtyń málim etkenindeı, bilim basqarmasy usynǵan tizimder negizinde lager qyzmetkerleri sottylyǵynyń bolýy, ákimshilik quqyqbuzýshylyqtarǵa tartylýy, sondaı-aq narkologııalyq jáne psıhıatrııalyq esepte turýy boıynsha tekserildi.
Onyń sózine qaraǵanda, lagerde jumysqa turǵysy kelgen 8 adamnyń buryn qylmystyq, taǵy beseýiniń ákimshilik jaýapkershilikke tartylǵany anyqtaldy. Osyǵan baılanysty aqparat tıisti sharalar qabyldaý úshin bilim basqarmasyna joldandy.
- Jazǵy demalys kezeńinde balalardyń bos ýaqytyn tıimdi uıymdastyrý men demalysyn qamtamasyz etýge erekshe nazar aýdarylyp otyr. Polıtsııa departamentimen kámeletke tolmaǵandar arasyndaǵy quqyqbuzýshylyqtardyń aldyn alý jumystary kúsheıtildi. Sonymen qatar balalardyń qaýipsizdigi men qoǵamdyq tártipti qamtamasyz etý boıynsha barlyq qajetti sharalar qabyldanatyn bolady, - dedi O.Ibraıymov.
Departament málimetine sáıkes bıylǵy bes aıda oblysta jasóspirimder jasaǵan qylmystar sany ótken jylǵy 39-dan 32-ge tómendep, 17,9 paıyzǵa azaıdy. Sondaı-aq kámeletke tolmaǵandarǵa qatysty jasalǵan qylmystar sany 5,8 paıyzǵa (86-dan 81-ge) kemidi.
Bıylǵy 19-25 mamyr aralyǵynda 86 mektep avtobýsy tekserilip, sonyń úsheýi (Oral qalasy, Kaztalov jáne Syrym aýdany) tehnıkalyq talaptarǵa saı kelmeıtini belgili boldy. Atalǵan kólik quraldarynyń aqaýlaryn joıý týraly nusqamalar berildi. Kemshilikter joıylǵannan keıin olar qaıta tekseriletin bolady.
- Sol sekildi jasóspirimderdiń túngi ýaqytta oıyn-saýyq oryndarynda nemese zańdy ókilderiniń qaraýynsyz turǵynjaıdan tys jerde bolý derekterin anyqtaý maqsatynda 25 mamyr men 1 maýsym aralyǵynda oblys aýmaǵynda «Demalys» jedel aldyn alý is-sharasy ótkizildi. Іs-shara barysynda 394 ákimshilik quqyqbuzýshylyq anyqtaldy. Onyń ishinde 335-i nemese 85 paıyzy kámeletke tolmaǵandardyń zańdy ókilderiniń qaraýynsyz túngi ýaqytta júrýimen baılanysty. Bul zańdy ókilderdiń balalardy baqylaýynyń jetkiliksiz ekenin kórsetedi, - dep qosty O.Ibraıymov.
Eske sala keteıik, budan buryn Oralda polıtsııa qyzmetkeri qyz zorlady degen kúdikke ilingenin jazǵan edik.
