BQO-da buralqy ıtter bir aýladan 60 qoıdy qyryp ketti
Syrym aýdanynyń ákimi Tólegen Tóreǵalıevtiń aıtýynsha, oqıǵa aýdan ortalyǵy Jympıty aýylynda boldy.
Onyń sózine qaraǵanda, keshe túnde buralqy ıtter aýyl turǵyny Batyrbek Jubanǵalıevtiń qorasyna kirip, 25 qoıy men 23 qozysyn óltirgen. Oǵan qosa, búgin túnde ıtterdiń taǵy 10 bas qoıdy qyryp ketkeni anyqtaldy.
«Búgin qoıǵa shapqan eki qańǵybas ıttiń kózi joıyldy. Sonymen qatar turǵynǵa qorany ıt kirmeıtindeı etip bekitý qajettigi aıtyldy. Itten ólgen malǵa ótemaqy qaralmaǵan. Atalǵan turǵynǵa basqalaı kómek kórsetý jaǵy qarastyrylýda. Jalpy, aýyldarda buralqy ıtterdiń kóbeıip, malǵa shaýyp jatqany ras. Olardy zalalsyzdandyrý baǵytynda tıisti sharalar jasalady», dedi QazAqparat tilshisine T.Tóreǵalıev.
Eske sala keteıik, budan buryn BQO-da ıt qabý jaǵdaılary kóbeıip ketkenin jazǵan bolatynbyz.