BQO-da buralqy ıtti aýlaý jumysyna et óńdeý kompanııasynyń jaýapty bolǵany ras pa
ORAL. KAZINFORM — It aýlaý jumystaryna 9 mln teńgeden astam qarjy bólindi. Jeńimpaz atanǵan «Órken» JShS-niń jumysy sáýirde bastalǵan. Al osy merdigerdiń negizgi baǵytynyń biri ashyq derekkózde et óńdeý jáne konservileý dep jazýly tur.
Elimizde buralqy ıt pen mysyqty aýlaý jumystaryna jergilikti ákimdik jaýapty. Bıyl BQO-da konkýrs ótip, «Órken» JShS janýarlardy aýlaý, «Jáńgir han atyndaǵy Batys Qazaqstan agrarlyq-tehnıkalyq ýnıversıteti» KeAQ qyzmetkerleriniń jergilikti kásipodaq uıymy» QB-i zararsyzdandyrý, sáıkestendirý jáne kútip-ustaýǵa jaýapty boldy.
Ashyq derekkózderge súıensek, ıt pen mysyqty aýlaýǵa jaýapty «Órken» JShS-niń negizgi baǵyty et óńdeý jáne buqtyrylǵan et daıyndaý. Alaıda BQO ákiminiń jáne Oral qalasy ákiminiń baspasóz qyzmetteri ıt aýlaýǵa jaýapty merdigerdiń taǵy ózge qyzmetteri týraly aqparatty ashyq aıtpady. Tipti, «ol suraqqa biz jaýap bermeımiz», «bilmeımiz» dep qysqa qaıyrdy.
Memlekettik satyp alý portalyndaǵy aqparatqa súıensek, konkýrsty Oral qalalyq TÚKSh jáne jolaýshylar kóligi jáne avtomobıl joldary bólimi jarııalady. Konkýrsqa eki kompanııa qatysyp, «Órken» JShS-i jeńimpaz atanǵan. Basshysy — Mıra Haıretdınova. Baılanys nómiri bolǵanymen, tutqany eshkim de kótermedi. Al Oral qalalyq TÚKSh jáne jolaýshylar kóligi jáne avtomobıl joldary bóliminiń basshysy Asyljan Haırýllın qazir issaparda júr. Jalpy ákimdik 9 mln teńgeden astam qarjyny eki bólip aýdarady. Bıyl 2,5 mln teńge, keler jylǵa 6,5 mln teńge qarastyrylǵan.
BQO ákimi baspasóz qyzmetiniń habarlaýynsha, elimizde ıt eti óńdeýge jatpaıdy. Oblystyq sanıtarııalyq-epıdemıologııalyq baqylaý departamentine jáne basqarmalarǵa ıt eti óńdelgeni týraly qandaı da bir shaǵym túspegen.
— Aýlanǵan ıt pen mysyq ýaqytsha ustaý pýnktine ornalastyrylady jáne aýlanǵan janýarlarǵa klınıkalyq tekserý júrgizilip, derekter bazasyna tirkeledi. Aýlanǵan janýarlarǵa kútim kórsetiledi, tordy kúndelikti mehanıkalyq tazalaý jáne dezınfektsııalaý júrgiziledi. Aýlanǵannan keıin ıt pen mysyq sterılızatsııadan, vaktsınatsııadan, degelmıntızatsııadan jáne sáıkestendirýden ótedi. Odan keıin janýarlar ýaqytsha ustaýǵa ornalastyrylady jáne olardyń mártebesine baılanysty tabıǵı mekendeý ortasyna qaıta jiberiledi. 1 sáýirden bastap Oral qalasy boıynsha 283 janýar aýlandy. Onyń ishinde 205-i zararsyzdandyrylyp, vaktsınatsııalanyp, qaıtadan tabıǵı mekendeý ortasyna jiberildi. Buryn sáıkestendirilgen 78 janýarǵa qaıta vaktsınatsııa júrgizilip, olar da mekendeý ortasyna qaıtaryldy, — dep habarlady BQO baspasóz qyzmeti.
Aıta keteıik, BQO-da ıt-mysyqty kútip ustaý, sáıkestendirý jáne zararsyzdandyrý qyzmetine 39,4 mln teńge bólindi.
Eske salsaq, Parlament buralqy ıtterdi qaıtarymsyz aýlaý modelin qoldady. Májilis «Qazaqstan Respýblıkasynyń keıbir zańnamalyq aktilerine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly» Zańǵa Senat jańa redaktsııada usynǵan jekelegen baptarmen kelisti.
