BQO-da brakonerler 3,2 myń dana shaıanmen ustaldy, polıtsııa is qozǵady

Batys Qazaqstan oblysynda brakonerlerden 16 qap shaıan tárkilendi, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, jergilikti polıtsııa qyzmeti tabıǵatty qorǵaý polıtsııa tobynyń qyzmetkerleri Peremetnyı-Vechnyı tasjolynda «Nıva» avtokóliginiń 39 jastaǵy júrgizýshisin toqtatqan. Tekserý kezinde kólik salonynan 16 qap shaıan (3285 dana, salmaǵy 181,55 kg) tabyldy.

«Júrgizýshi shaıandardy Báıterek aýdany aýmaǵyndaǵy ózenderden aýladym dep túsindirdi. Qazirgi kezde keltirilgen shyǵyn kólemi anyqtalý ústinde.

Atalǵan derek boıynsha QR Qylmystyq kodeksiniń 335-baby 1-bóligine (balyq resýrstaryn, basqa da sý janýarlaryn nemese ósimdikterin zańsyz alý) sáıkes sotqa deıingi tergeý amaldary júrgizilýde. Jyl basynan oblysta QR QK-niń 339-babyna sáıkes (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) – 51, QR QK-niń 337-babyna (zańsyz ańshylyq) sáıkes – 4, QR QK-niń 340-babyna (aǵashtar men butalardy zańsyz kesý, joıý nemese zaqymdaý) sáıkes 2 derek anyqtaldy», –dep habarlady vedomstvodan.