BQO-da bir úıir jylqynyń sorǵa batyp ólgeni ras pa — ákimdik jaýap berdi

ORAL. KAZINFORM — Batys Qazaqstan oblysy Kaztalov aýdanynda bir úıir jylqynyń sorǵa batyp ólgeni týraly áleýmettik jelide beınejazba taraldy.

Beınejazbadaǵy er adamnyń sózine qaraǵanda, oqıǵa Kókterek aýyldyq okrýgi Saraljyn eldi mekeni mańyndaǵy Shalaman sorynda bolǵan. Bir úıir jylqy sorǵa batyp ketken. Sonyń ishinde bireýiniń tiri turǵany beınejazbaǵa ilikken.

Osy oqıǵaǵa baılanysty Kazinform tilshisi Kaztalov aýdany ákimdigine arnaıy saýal joldaǵan edi. 

Kaztalov aýdany ákiminiń kómekshisi, baspasóz hatshysy Asylbek Násipqalıulynyń aıtýynsha, qazirgi tańda maldyń shyǵyny eseptelip jatyr. 

— Qysqa daıyndyq barysynda turǵyndarǵa, sharýa qojalyqtary jetekshilerine aldyn ala túsindirý jumystary júrgizildi. Maldy qorajaıda ustaý kerektigi týraly aıtyldy. Degenmen boran kezinde yǵyp ketken maldardyń bolýy múmkin. Bul jylqylardyń qaı sharýashylyqqa, qaı aýyl-aımaqqa tıesili ekendigin anyqtaý ázirge múmkin emes, — dedi A.Násipqalıuly.

Bul — Kaztalov aýdanynda bolǵan osyndaı ekinshi oqıǵa. Budan buryn 14 jeltoqsan kúni Birik aýyldyq okrýgine qarasty Ájibaı aýylynan 28 shaqyrym qashyqtyqta ornalasqan Jumyr qystaǵynda qoılar qar astynda qalyp, shyǵynǵa ushyraǵan edi.

Eske sala keteıik, budan buryn Batys Qazaqstanda aýyl turǵyndary qarǵa kómilip qalǵan qoılardy qutqarǵanyn jazǵan edik.

Sondaı-aq BQO-nyń Bókeı ordasy aýdanynda tótenshe jaǵdaı jarııalandy.