BQO-da boranǵa baılanysty jol jabyldy
ASTANA. QazAqparat - Batys Qazaqstan oblysynda boranǵa baılanysty jol jabyldy, dep habarlaıdy QazAqparat tilshisi.
"Qazavtojol" JShS BQO fılıalynyń málimetine qaraǵanda, búgin saǵat 11.00-den bastap qatty burqasynǵa baılanysty ońtústik aýdandar baǵytyndaǵy joldar jabyldy.
Atap aıtqanda, respýblıkalyq mańyzy bar «Qaztalov-Jánibek-RF shekarasy» jáne «Ónege-Bısen-Saıqyn» jolynda barlyq avtokólikter qozǵalysyna shekteý qoıyldy.
Osyǵan baılanysty BQO TJ departamenti eskertý jarııalap, turǵyndarǵa SMS- habarlamalar jiberýde.
Oǵan qosa "Qazgıdromet" RMK BQO fılıaly habarlaǵanyndaı, 5 qańtar kúni óńirdiń keı jerlerinde tuman túsip, kóktaıǵaq bolady. Burqasyn kóterilip, ońtústik-batystan soǵatyn jeldiń jyldamdyǵy sekýndyna 9-14, keı jerlerde 15-20 metrge deıin jetýi yqtımal.
Sonymen qatar, BQO jolaýshylar kóligi jáne avtomobıl joldary basqarmasynyń málimetine sáıkes, saǵat 13.00-den bastap oblystyq mańyzy bar "Jalpaqtal-Juldyz-Qarasý" jáne "Jańaqala-Saıqyn" joldary da jabyldy.
