BQO-da boranǵa baılanysty respýblıkalyq jol jabyldy

ORAL. QazAqparat – Batys Qazaqstan oblysynda boranǵa baılanysty respýblıkalyq jolda qozǵalysqa shekteý qoıyldy, dep habarlaıdy QazAqparat tilshisi.

«Qazavtojol» JShS BQO fılıalynyń málimeti boıynsha búgin jergilikti saǵat 09.00-den bastap respýblıkalyq mańyzy bar Oral-Tasqala-RF shekarasy (76-104 km, Tasqala aýylynan Reseı shekarasyna deıin) joly barlyq kólik túrleri úshin jabyldy.

Osy mańda kúshti jel kóterilip, boran soǵyp tur, sonyń kesirinen joldyń kórinýi nasharlaǵan.

Keshe «Qazgıdromet» RMK málimetine sáıkes 10 aqpan kúni oblystyń batysy, soltústigi jáne shyǵysynda tuman túsip, kóktaıǵaq bolyp, jaıaý burqasyn kóteriletini jóninde BQO TJ departamenti eskertý jarııalaǵan bolatyn. Jeldiń ekpini sekýndyna 15-20 metrge jetedi.

Oralda da kún buzylyp tur.

Eske sala keteıik, budan buryn Batys Qazaqstanda aýa raıyna baılanysty respýblıkalyq jol jabylǵanyn jazǵan bolatynbyz.