BQO-da boranǵa baılanysty birqatar aýdanda elektr jaryǵy óshti
ORAL. KAZINFORM – Batys Qazaqstan oblysynda kún raıy kúrt buzyldy.
«Qazgıdromet» RMK fılıalynyń málimetine sáıkes, 14 jeltoqsanda óńirde kóktaıǵaq, burqasyn, qatty qar, tuman baıqalady, sondaı-aq oblystyń batysy men soltústiginde jańbyr men qar túrindegi jaýyn-shashyn túsip jatyr.
Jeldiń ekpini sekýndyna 15–20, keı jerlerde 23–28 metrge deıin jetedi. Osyǵan baılanysty avtojoldarda kóktaıǵaq paıda bolyp, burqasyn saldarynan joldardyń jekelegen ýchaskeleri jabyldy.
Qolaısyz aýa raıyna baılanysty 14 jeltoqsanda kelesi avtojol ýchaskeleri jabyq:
– Oral – Atyraý tas joly;
– Úlken Shaǵan – Peremetnyı tas joly.
Jabylý sebebi – burqasyn.
Saǵat 11.30-daǵy málimet boıynsha qolaısyz aýa raıyna baılanysty oblysta birqatar respýblıkalyq mańyzy bar avtojol ýchaskesinde (Kaztalov – Jánibek, Ónege – Saıqyn, Oral – RF shekarasy, BQO – Atyraý oblysy shekarasy, Chapaev – Qaztalov) barlyq kólik túri úshin qozǵalysqa ýaqytsha shekteý engizildi.
BQO ákimdiginen túsken málimetke qaraǵanda, sonymen qatar aýa raıynyń kúrt nasharlaýyna baılanysty oblystyń birqatar aýdanynda elektr energııasynyń ýaqytsha óshýi tirkeldi. Qazirgi ýaqytta energetıka salasynyń qyzmetteri kúsheıtilgen rejımde jumys istep, elektr jelilerin qalpyna keltirý sharalaryn júrgizip jatyr.
– Osyǵan baılanysty Batys Qazaqstan oblysynyń ákimi Narıman Tóreǵalıev energetıka salasyna jaýapty organdardyń qatysýymen jınalys ótkizip, ahýaldy jeke baqylaýyna aldy. Oblys ákimi óńirlik elektr jelileri uıymdaryna, tótenshe jaǵdaılar qyzmetterine jáne jergilikti atqarýshy organdarǵa elektrmen jabdyqtaýdy qalpyna keltirý jumystaryn jedeldetý jóninde naqty tapsyrmalar berdi. Turǵyndar tótenshe jaǵdaılar týyndaǵan jaǵdaıda «112» biryńǵaı baılanys nómirine habarlasa alady, - delingen resmı málimette.
Turǵyndardyń sózine qaraǵanda, Kaztalov, Jánibek jáne Bókeı ordasy aýdandarynda jaryq óshken. Boranǵa baılanysty jolda qalǵan kólikter bar.
Búgin Oral qalasyndaǵy Zachagan kentinde de jaryq sóndi.
Eske sala keteıik, budan buryn aýa raıyna baılanysty Aqtaý men Atyraýǵa ushatyn reıs keshigip jatqanyn jazǵan edik.