BQO-da boranda joǵalyp ketken úsh adamnyń denesi tabyldy

ORAL. KAZINFORM — Batys Qazaqstan oblysynda 13-14 jeltoqsandaǵy boran kezinde joǵalyp ketken adamdardy izdestirý jumystary júrgizilip jatyr. 

BQO polıtsııa departamentiniń baspasóz qyzmetinen túsken málimetke qaraǵanda, búgin Jánibek aýdany Kúıgenkól aýyldyq okrýginiń ortalyǵy Jasqaırat aýyly mańynda 57 jastaǵy er adamnyń denesi tabyldy.

Sondaı-aq Bókeı ordasy aýdanynda 25 jastaǵy, Kaztalovta 35-tegi er adamnyń qaza tapqany belgili boldy.

Marqumdar úsip ketken.

Aqjaıyq aýdanynda 54 jastaǵy er adam tiri tabyldy. Onyń aıaq-qoly úsigen, Oral qalasyna jetkiziledi.

— Qazirgi tańda Jánibek aýdanynda 59 jastaǵy er adamdy izdestirý jumystary jalǵasyp jatyr. Buǵan TJ, áskerı bólim, polıtsııa jáne jergilikti atqarýshy organdardan 48 adam, 8 tehnıka jumyldyrylǵan, — dep habarlady vedomstvodan.

Eske sala keteıik, budan buryn BQO-da sý munarasy qulap, bir adamnyń joǵalyp ketkenin jazǵan edik.

Sondaı-aq BQO-da borandy kúni adasyp ketken eki adam tabylmaı jatyr.