BQO-da boranda sharýa qojalyǵynan 50 iri qara maly shyǵynǵa ushyrady

ORAL. KAZINFORM — Jánibek aýdany Aqoba aýyldyq okrýgine qarasty «Jıenbet» qystaǵynda mal shyǵyny boldy. 

«Ǵalıev» sharýa qojalyǵynyń jetekshisi Ǵarıfolla Ǵalıevtiń málimetine sáıkes 14-15 jeltoqsandaǵy qarly boran kezinde 50 bas iri qara maly Aşyózek saıynyń soryna batyp ketip, ólgen.

Onyń sózine qaraǵanda, 11 bas iri qara malyn shyǵaryp úlgerip, soıýǵa jiberilgen. Sonymen qatar 50 iri qara men 17 jylqysy izdestirilip jatyr.

Aqoba aýyldyq okrýginiń ákimi Nurlybek Turymtaıulynyń aıtýynsha, 50 bas mal shyǵynyna qatysty veterınarııa mamandarymen akt jasalyp, ólekselerdi jınaý jumystary uıymdastyrylyp jatyr.

Jánibek aýdany ákimdiginiń málimeti boıynsha atalǵan qojalyqta 4 adam jumyspen qamtylǵan. Mal azyǵy jetkilikti daıyndalǵan, elektr jaryǵy kún sáýlesi batareıasy jáne generator arqyly beriledi. Qazirgi ýaqytta qojalyqta 162 bas iri qara, 282 bas usaq mal jáne 17 jylqy tirkelgen.

Eske sala keteıik, budan buryn BQO-da bir úıir jylqynyń sorǵa batyp ólgeni ras pa, soǵan baılanysty ákimdik jaýap bergenin jazǵan bolatynbyz.