BQO-da boran: Oblystyq joldarda da kólik qozǵalysy shekteldi
ORAL. QazAqparat – Batys Qazaqstan oblysynda boranǵa baılanysty oblystyq mańyzy bar joldarda kólik qozǵalysy shekteldi, dep habarlaıdy QazAqparat tilshisi.
BQO jolaýshylar kóligi jáne avtomobıl joldary basqarmasy málim etkenindeı, 17 naýryz kúngi jergilikti saǵat 23.00-den bastap aýa raıynyń nasharlaýyna baılanysty oblystyq mańyzy bar toǵyz jol jabyldy.
Atap aıtqanda, Bórli-Aqsaı-Jympıty (38-159 km), Jympıty-Qaratóbe (0-103 km), Prıýral-Aqsaı (0-35), Úlken Shaǵan-Peremetnyı (0-42 km), Oral-Kırsanov (1-83 km), Barbastaý-Aqjaıyq-Inderbor (0-108 km), Tasqala-Aqqýraı-Bolashaq-RF shekarasy (0-157 km), Ańqaty-Saryómir (0-64 km) jáne Fedorov-Aqsaı (0-82 km) joldarynda barlyq avtokólik túrleri úshin qozǵalys shekteldi.
Osyǵan oraı BQO TJ departamenti eskertý jarııalanyp, tótenshe jaǵdaılardy boldyrmaý maqsatynda habarlamalardyń taratylyp jatqanyn jetkizdi.
Qazirgi kezde Oral qalasynda da boran soǵyp tur.
Eske sala keteıik, budan buryn BQO-da boranǵa baılanysty respýblıkalyq joldar jabylǵanyn jazǵan bolatynbyz.
