BQO-da Bókeı ordasy men Jánibek aýdanyna jol salý jumysy kesheýildep otyr
QazAqparat budan buryn jazǵanyndaı, Elbasy Nursultan Nazarbaevtyń 2018 jylǵy mamyr aıynda óńirge jumys sapary kezinde bergen tapsyrmasyna sáıkes atalǵan qos aýdanǵa jol salý qolǵa alynǵan bolatyn.
«QazAvtoJol» UK» AQ BQO fılıalynyń dırektory Ámir Kárimbaevtyń óńirlik kommýnıkatsııalar qyzmeti alańynda málim etkenindeı, qazirgi kezde jalpy uzyndyǵy 248 shaqyrym Kaztalov-Jánibek-RF shekarasy jáne Ónege-Bısen-Saıqyn avtojoldaryn kúrdeli jóndeý jalǵasýda.
Kúni búgin buǵan barlyǵy 250 jol-qurylys tehnıkasy, 370 jumysshy (85 paıyzy – jergilikti turǵyndar) tartylǵan. Jol boıynda 5 usaqtaý qondyrǵysy men 4 asfalt-beton zaýyty ornatylǵan.
«Koronavırýs indetine baılanysty óńirde qalyptasqan kúrdeli epıdemıologııalyq ahýal men jaýyn-shashynǵa (topyraqtyń shamadan tys ylǵaldanýyna) baılanysty jol-qurylys jumystary kesteden 30-dan 70 kúntizbelik kúnge deıin kesheýildep otyr», dedi Á.Kárimbaev.
Onyń sózine qaraǵanda, konkýrstyq rásimder 2019 jyldyń aıaǵynda júrgizilip, merdigerler anyqtaldy. Jyldyń sońy bolǵannan keıin qys boıy daıyndyq jumystary jasaldy. Alys aýdandar bolǵandyqtan, qurylys materıaldaryn temirjol arqyly tasymaldaý kerek boldy.
«Ótken jyly pandemııaǵa tap boldyq. Qarajat tapshylyǵy da týyndady. Sonyń saldarynan 10 shaqyrym jolǵa ǵana asfalt tóseldi. Bıylǵy kóktemde jaýyn-shashynnyń jıi túsýi jumysty qıyndatty. Bıyl 37 shaqyrym qatqyl tabandy jol tartyldy. Qazirgi kezde kúnniń qolaıly ýaqytyn paıdalanyp, asfalt tóseý jumysy jalǵasýda. Bókeı ordasy aýdany ortalyǵy Saıqyn aýylynan «Aqjol qurylys» JShS 10 shaqyrym jol tartty. Ónege-Bısen baǵytynda «Atyraý joldary» JShS jumys isteýde. Aınalma joldar da baqylaýda. Eger turǵyndar jol qıyndyǵyna ushyrasa, 1403 telefony boıynsha habarlasýǵa bolady», dedi fılıal dırektory.
Eske sala keteıik, budan buryn BQO-da «Nurly jol» baǵdarlamasy aıasynda eki respýblıkalyq joldyń jańǵyrtylatynyn, Samara men Saratov baǵytyndaǵy joldar júk kólikteri úshin aqyly bolatynyn jazǵan edik.
https://kaz.inform.kz/news/bokey-ordasy-men-zhanibek-audandaryna-zhol-salynady_a3265810
https://kaz.inform.kz/news/nurly-zhol-bko-da-eki-respublikalyk-zhol-zhangyrtylady_a3857244
https://kaz.inform.kz/news/bko-samara-men-saratov-bagytyndagy-zholdar-zhuk-kolikteri-ushin-akyly-bolmakshy_a3857266