BQO-da Bokei Orda Trail 2023 marafonynyń jeńimpazdary anyqtaldy

ORAL. QazAqparat - Astana kúnine oraı Batys Qazaqstan oblysy Bókeı ordasy aýdanynyń tarıhı Han ordasy aýylynda Bokei Orda Trail 2023 respýblıkalyq júgirý marafony máresine jetti, dep habarlaıdy QazAqparat tilshisi.

Osymen ekinshi ret uıymdastyrylyp otyrǵan jarysqa Mańǵystaý, Aqtóbe, Atyraý jáne Batys Qazaqstan oblystarynan 100-den astam jelaıaq qatysyp, baq synady.

Jarystyń ashylý saltanatyna qatysqan Bókeı ordasy aýdanynyń ákimi Nurlybek Daýmov jınalǵandardy Astana kúnimen quttyqtap, ıgi tilegin bildirdi.

BQO qoǵamdyq damý basqarmasynyń basshysy Nurdildá Oraz tuńǵyshtar mekeni atalǵan Han ordasyna alǵash ret aıaq basyp otyrǵanyn aıtyp, tabıǵaty ásem jerde mundaı sporttyq is-sharanyń keń kólemde uıymdastyrylýynyń máni zor ekendigin jetkizdi.

Týrnırdi uıymdastyrýshylardyń sózine qaraǵanda, kún ystyq bolǵandyqtan, marafon tańǵy saǵat 06.00-de bastalyp, qatysýshylar 7 shaqyrym qashyqtyqty qalyń qumnyń ishimen júgirip ótti.

Qorytyndysynda erler arasynda oraldyq Qanybek Ersaıyn jeńimpaz atansa, kaztalovtyq Baýbek Іlııasov ekinshi, Aqjaıyq aýdanynan kelgen Qýandyq Tólegenov úshinshi orynǵa ıe boldy.

Áıelder arasynda oraldyqtar Lázzat Tólepbergenova, Aıman Sársenǵalıeva jáne Dıana Ásetova úzdik úshtikke ilikti.

Jeńimpaz-júldegerler dıplom, medaldarmen jáne aqshalaı syılyqtarmen marapattaldy.