BQO-da Bilim kúni balalar qaýipsizdigin saqtaýǵa 540-qa jýyq polıtsııa qyzmetkeri jumyldyryldy
ORAL. KAZINFORM — Batys Qazaqstan oblysynda jańa oqý jylynyń bastalýyna oraı polıtsııa departamenti jergilikti atqarýshy organdarmen birlesip, balalardyń qaýipsizdigin saqtaý baǵytynda sharalar qabyldady.
Bilim kúni polıtsııa qyzmeti kúsheıtilgen kestege kóshirilip, barlyq oqý uıymdarynda qaýipsizdikti qamtamasyz etýge 539 qyzmetker men 120 avtokólik jumyldyryldy.
Jańa oqý jylynyń alǵashqy kúnderinen bastap mektep aldyndaǵy jol ótkelderinde balalar jaraqatynyń aldyn alý maqsatynda tańerteń, túski jáne keshki ýaqytta ıývenaldy jáne patrýldik polıtsııa ınspektorlary qyzmet atqaratyn bolady.
Bilim merekesine oraı BQO polıtsııa departamentiniń bastyǵy, polıtsııa polkovnıgi Arman Orazalıev Oral qalasyndaǵy № 1 orta mektepte bolyp, balalardy jańa oqý jylymen quttyqtady.
Departament basshysy oqýshylarǵa sáttilik tileı otyryp, quqyq buzýshylyqtarǵa jol bermeı, jol qozǵalysy erejelerin qatań saqtaýǵa shaqyrdy.
«Oqýshylar arasynda jábirleý – býllıng degen problema bar. Bul ár túrli sıpatta bolady, onyń saldary sýıtsıdke ákelýi múmkin. 12-den 16 jasqa deıingi balalar býllıng jasasa, onyń zańdy ókili ákimshilik jaýapqa tartylady. Al 16-dan 18 jasqa deıingi jasóspirimder jasasa, ózderi jaýapqa tartylady. Mundaı áreketterge jol bermeńizder. Úlkender kishilerdi qorǵap júrińizder. Mektep ákimshiliginen osy máseleni baqylaýǵa alýdy suraımyn», - dedi Arman Moldııaruly.
Departament bastyǵy sonymen qatar jasóspirimderdiń esirtki taratý jolyna túsip, nashaqorlyqtyń quryǵyna ilikpeýi úshin ata-analar tarapynan únemi baqylaý bolýy qajettigin atap ótti. Sebebi mundaı áreketter úshin qylmystyq jaýapkershilik 14 jastan bastap kózdelgen, sot praktıkasy boıynsha 7 jylǵa deıin bas bostandyǵynan aıyrý jazasy qarastyrylǵan.
«Qazir biz «Oral – esirtkisiz qala» dep atalatyn jańa joba boıynsha jumysty bastadyq. Bul jumysqa barlyq múddeli uıymdardy jumyldyrdyq. Qumar oıyndarǵa, ásirese, joǵary synyp oqýshylary áýes bolmańyzdar. Bul oraıda barlyq problemany aıtý múmkin emes. Sondyqtan ata-analardan jáne mektep ujymynan mundaı jaǵdaılardy baıqasańyz, arnaıy jedel jelige habarlasýyńyzdy suraımyn. Birlese jumys isteýge shaqyramyn», - dedi A.Orazalıev.
Sondaı-aq ol óz sózinde skýterlerdi basqarý boıynsha zańnyń kúshine engenin aıtyp, osy kólik túrin qoldanýda jol qozǵalysy erejelerin buzǵany úshin ákimshilik jaýapkershilik qarastyrylǵany jóninde eskertti.
Bilim kúni polıtsııa qyzmetkerleri óńirdegi mektep, kolledjderde bolyp, jasóspirimder arasynda quqyq buzýshylyqtyń aldyn alýǵa jurtshylyqtyń nazaryn aýdardy.
Eske sala keteıik, budan buryn Batys Qazaqstanda jastar arasynda esirtkige táýeldiler nelikten kóbeıip otyrǵanyn jazǵan bolatynbyz.
