BQO-da «Bıznes-bastaý» jobasy júzege asyrylmaq
ORAL. QazAqparat - Elbasy «Qazaqstannyń úshinshi jańǵyrýy: jahandyq básekege qabilettilik» atty Joldaýynda eldiń ishki jalpy ónimindegi shaǵyn jáne orta bıznestiń úlesin 2050 jylǵa qaraı 50 paıyzǵa deıin jetkizý mindetin qoıǵany belgili.
Osyǵan oraı óńirde kásipkerlikti odan ári damytý baǵytynda naqty jumystar atqarylatyn bolady. Bul týraly óńirlik kásipkerler palatasynyń dırektory Nurlan Qaıyrshın málim etti, dep habarlaıdy «QazAqparat» HAA tilshisi.
Onyń aıtýynsha, «Bıznestiń jol kartasy - 2020» baǵdarlamasy aıasynda «Bıznes keńesshi» jobasy boıynsha kásipkerlik negizderine oqytý 2015 jyldan bastap qolǵa alyndy. Osy oraıda kásipkerlikti qarjylaı qoldaý tetikterin engizý, ákimshilik kedergilerdi alyp tastaý sekildi jumystar jalǵasady. Sonyń ishinde aýyl kásipkerlerin qoldaýǵa erekshe kóńil bólinbek. Osy baǵytta «Bıznes-bastaý» jobasy júzege asyrylmaq. Budan buryn qanatqaqty joba retinde Mańǵystaý jáne Aqtóbe oblystarynda qolǵa alynǵan «Bıznes-bastaýdyń» maqsaty - ózin-ózi qamtyp otyrǵan jáne jumyssyz turǵyndardy kásipkerlikke tartý arqyly aýyl halqynyń ekonomıkalyq belsendiligin arttyrý. Aldymen bes aýdanda myńǵa jýyq adam oqytylady. Sodan keıin barlyq aýdandar qamtylmaqshy.
Sonymen qatar aýyl kásipkerlerin jeńildikpen shaǵyn nesıeleý de nazarda bolmaq. Bul jumysty BQO ákimdigi men «Aýyl sharýashylyǵyn qarjylaı qoldaý qory» AQ birlesip atqarady. Osy maqsatqa BQO ákimdigi 300 mln. teńge, qor sonsha kólemde qarjy bóledi. Ár kásipker 18 mln. teńgege deıingi nesıeni 7 paıyzdyq mólsherlememen ala alady. Kepildikke saman úı, tehnıkany qosqanda, kez kelgen jyljıtyn jáne jyljymaıtyn múlik qoıylady.
Aıta keteıik, 2016 jyly óńirlik kásipkerler palatasyna kásipkerlerden bıznesterin qorǵaý jóninde 133 ótinish tússe, sonyń 71-i boıynsha oń sheshim qabyldanǵan. Shaǵym jer qatynastary, memlekettik satyp alý, kelisimge kelý rásimderi, salyq, básekelestik jáne baǵa belgileý máseleleri boıynsha jıi túsedi. Ótken jyly 564,941 mln. astam teńgeniń múliktik quqyǵy qorǵaldy.
2016 jyly servıstik qoldaý aıasynda segiz baǵyt boıynsha 1930 qyzmet (157,2 paıyz) kórsetilgen. Sondaı-aq aýdandyq kásipkerlikke qoldaý ortalyqtarynyń keńesshileri 7411 adamǵa 7663 keńes (114 paıyz) bergen.
Óńirlik kásipkerler palatasynyń septesýimen 304 nysan óz jobalaryn júzege asyrý úshin 1 mlrd. 664,743 mln. astam teńge kóleminde qarjylaı qoldaýǵa qol jetkizdi, 228 jańa kásipkerlik nysany ashyldy.
Ótken jyly kásipkerlikti damytýdyń óńirlik kartasyna 20 486,2 mln. teńgeni quraıtyn aýyl sharýashylyǵy, óńdeý ónerkásibi, saýda jáne qyzmetter baǵytyndaǵy segiz joba engizildi.
