BQO-da bıyl 466 km jol jóndeý kózdelýde

ORAL. QazAqparat - Batys Qazaqstan oblysynda bıyl 466 shaqyrym jol jóndeý kózdelýde. Bul týraly «Qazaqstan - Oral» telearnasynan tikeleı efırde oblys ákimi Altaı Kólginov málim etti, dep habarlaıdy «QazAqparat» HAA tilshisi.

Onyń aıtýynsha, Elbasy tapsyrmasyna sáıkes óńir joldaryn jóndeýge qomaqty qarjy bólinip keledi. Mysaly, ótken jyly 23,5 mlrd. teńgege 292 shaqyrym jol retke keltirildi. Bıyl oblys joldaryn jóndeýge barlyq qarjy kózderinen 36,5 mlrd. teńge qaralyp otyr.

«Oral qalasynyń ózinde 8 mlrd. teńgege 67 kóshe jóndeledi. Mundaı kólemdegi jóndeý eshqashan bolǵan emes. Oǵan qosa depo kópiri 2,3 mlrd. teńgege keńeıtilip, qaıta salynady. Qazir onyń jartysynan astamy buzyldy. Bul qurylys eki jylǵa eseptelgenmen, «aryq aıtyp, semiz shyq», degen, jumysty barynsha sapaly da tez atqarýǵa kúsh salýdamyz. Buryn qalanyń ortalyq kóshelerindegi joldar retke keltirilse, endi shetkeri aýmaqtaryna da kóńil bólinýde. Mundaı jumystar oblys aýdandarynda da jasalady. «Nurly jol» baǵdarlamasyna sáıkes Oral-Tasqala-RF shekarasy baǵytynda bıyl 9 mlrd. teńgege 50 shaqyrymdaı jol salynady. Sol sekildi respýblıkalyq mańyzy bar Chapaev-Jalpaqtal-Jánibek baǵytyndaǵy joldy kúrdeli jóndeý jalǵasady. Qazir jol Jalpaqtalǵa deıin jetse, bıyl odan asyp, Qaztalov aýylyna deıingi joldyń jobalyq-smetalyq qujattamasy jasalady. Bul qujattama daıyn bolsa, kelesi jyldyń josparyna engiziledi. Jánibekten beri qaraı 11 km jol tartylsa, bıyl ol 20 shaqyrymǵa jetedi. Sonymen qatar qala ǵana emes, eldi mekenderdegi aýylishilik joldar da salynatyn bolady. Jalpy, joldarǵa qatysty shaǵym óte kóp. Sondyqtan bul máseleni únemi nazarda ustap otyrmyz. Ekinshiden, jol salatyn merdiger mekemeler óz jumysyn sapasyz atqaratyn bolsa, olarǵa tıisti sharalar alynady», dedi Altaı Kólginov.

Óńir basshysy eki saǵatqa jýyq ýaqyt ishinde oblystaǵy ózekti máselelerdi alǵa tarta otyryp, turǵyndardyń saýaldaryna da jaýap berdi.