BQO-da bıyl 31 adam VICh-ınfektsııasyn juqtyrǵan
ORAL. QazAqparat - Batys Qazaqstan oblysynda bıylǵy on aıda 31 adamnyń VICh-ınfektsııasyn jańadan juqtyrǵany belgili boldy, dep habarlaıdy «QazAqparat» tilshisi.
Oblystyq SPID-tiń aldyn alý jáne onymen kúres ortalyǵynan túsken málimetke qaraǵanda, sonyń 80 paıyzdan astamy aýrýdy jynystyq jolmen juqtyrǵan. Dárigerlerdiń dabyl qaǵarlyqtaı jóni bar. Júrgizilgen aldyn alý sharalaryna qaramastan, keı jastardyń jynystyq qatynastarǵa kózqarasy jeńil ári jaýapsyz bolyp otyr. Keıbir zertteýler kórsetkenindeı, jasóspirimderdiń jartysy 16 jasqa qaraı munyń «dámin» tatyp úlgeredi, 20 jasqa qaraı jastardyń seksýaldyq belsendiligi 80 paıyzǵa jetedi.
Jalpy, juqpaly keselge shaldyqqandardyń 434-i Oral qalasynda, 61-i Zelenov aýdanynda, 31-i Bórlide, 19-y Shyńǵyrlaýda, 8-i Terektide, altaýy Aqjaıyqta, beseýi Tasqalada, ekeýi Jánibekte, Jańaqala men Qaratóbede bir-birden tirkelgen. Oblysta 1996 jyldan beri VICh-ınfektsııasyn juqtyrǵan 568 adam anyqtalǵan.
Atalmysh ortalyqtyń emdeý-aldyn alý bóliminiń meńgerýshisi Jansha Nuryshevanyń aıtýynsha, qazirgi kezde emdelýshilerdiń eń jasy 4-te, úlkeni 67-de. Al 2010 jyly bir jasar bala atalǵan dertti juqtyrǵan. Eń uzaq ýaqyt boıy em alyp kele jatqan naýqastyń jasy qazir 38-de. Ol 2001 jyly esepke alynyp, 2004 jyldan beri emdelýde. Kúni búgin ortalyqta 317 adam esepte tursa, sonyń 246-sy terapııalyq em alýda.
