BQO-da bıyl 2600 tonna et eksporttaý kózdelýde
ORAL. QazAqparat - Batys Qazaqstan oblysynda bıyl 2600 tonna et eksporttaý kózdelýde, dep habarlaıdy «QazAqparat» tilshisi.
Oblystyq aýyl sharýashylyǵy basqarmasy basshysynyń orynbasary Jasulan Halıýllınniń aıtýynsha, sonyń ishinde 2420 sıyr jáne 180 tonna qoı eti jóneltilmek. Jalpy, batysqazaqstandyq kásiporyndar etti negizinen Iran, Armenııa, Belarýs, Reseı Federatsııasy qalalaryna shyǵarýda. Ótken jyly 1700-den astam sıyr jáne 505 tonna qoı eti eksporttaldy.
«Bul baǵyttaǵy jumystar jalǵasatyn bolady. Bizdiń óńirdiń ónimderine qyzyǵýshylyq tanytyp otyrǵan basqa da elder bar. Olarmen de kelissózder júrgizilýde», dedi J.Halıýllın.
Bıylǵy jyl basynan beri 37 tonna sıyr jáne 32 tonna qoı eti eksportqa shyǵaryldy. Oǵan qosa kesheden beri óńirdegi osy baǵyttaǵy belgili kásiporynnyń biri - «Kýbleı» JShS-dan 40 tonna qoı eti Iranǵa jóneltildi. Seriktestiktiń tehnıkalyq dırektory Rahym Naǵmetovtiń sózine qaraǵanda, munda ekologııalyq taza ónim óndiriledi. Ol sapasy jóninen barlyq talaptarǵa saı keledi. Buǵan deıin 200 tonnadan astam Iranǵa et shyǵarǵan kásiporyn tek osy elge ǵana emes, sondaı-aq Reseı, Qytaıǵa da ónim jóneltýdi josparlap otyr.
