BQO-da bıyl 24 eldi mekendi tabıǵı gazǵa qosý kózdelýde
ORAL. QazAqparat - Batys Qazaqstan oblysynda bıyl 24 eldi mekendi tabıǵı gazǵa qosý kózdelýde, dep habarlaıdy QazAqparat tilshisi.
Óńirlik kommýnıkatsııalar qyzmetinde BQO energetıka jáne turǵyn úı-kommýnaldyq sharýashylyq basqarmasynyń basshysy Ǵalym Orynǵalıevtiń málim etkenindeı, bul maqsatqa 1,464 mlrd teńge bólinse, sonyń 1,357 mlrd teńgesi respýblıkalyq, 0,107 mlrd teńgesi oblystyq bıýdjetten qaraldy.
Ǵ.Orynǵalıevtiń aıtýynsha, atalǵan 24 eldi mekende 9,7 myń adam turady. Sonyń ishinde oblys ortalyǵynan eń shalǵaı ornalasqan Bókeı ordasy aýdanynda 11 eldi mekenge (joba quny - 1794,2 mln teńge, 6372 turǵyn, gaz qubyrynyń uzyndyǵy - 275,4 shaqyrym) «kógildir otyn» jetkizilmek. Sol sekildi Aqjaıyq aýdanynda 11 eldi mekenge (joba quny - 556,179 mln teńge, 2940 turǵyn, uzyndyǵy - 167,4 shaqyrym) gaz qubyry tartylmaq. Oǵan qosa Jánibekte Ónege (joba quny - 53,899 mln ), Zelenovta Fakel (33,976 mln teńge) eldi mekenderi osy ıgilikke qol jetkizbek.
«Sonda jyl sońynda oblys halqynyń gazben qamtylý kórsetkishi 95,4 paıyzǵa (612,3 myń adam) jetedi», dedi Ǵ.Orynǵalıev.
Sonymen qatar 4,4 myń turǵyny bar 14 eldi mekendi gazdandyrý jumysy bıyl bastalyp, kelesi jyly aıaqtalady. Sondaı-aq Qaztalov aýdanynyń 15 eldi mekenin gazdandyrýǵa jobalyq-smetalyq qujattama jasaý úshin oblystyq bıýdjetten 7 mln teńge bólindi (jalpy quny - 101,0 mln teńge). Qurylys merzimi - 2019-2021 jyldar. Onyń syrtynda Terekti aýdanynyń 19 eldi mekenine gaz qubyryn tartý úshin 2019-2021 jyldarǵa bıýdjettik ótinim joldandy.
Aıta keteıik, atalmysh basqarmanyń 2017 jylǵy bıýdjeti 8,9 mlrd teńgege jetse, bıyl 4,2 mlrd teńge kóleminde bekitildi. Ótken jyly oblysty gazdandyrýǵa 3,425 mlrd teńge jumsalǵan bolatyn.
