BQO-da birneshe kúnge sozylǵan orman órti sóndirildi
ORAL. QazAqparat – Batys Qazaqstan oblysynda sońǵy kúnderi birneshe iri tabıǵı órt tirkeldi, dep habarlaıdy QazAqparat tilshisi.
BQO TJ departamentiniń bastyǵy Jasulan Jumashevtiń aıtýynsha, buǵan kúnniń 37-39, keı jerlerde 40-42 gradýs ysýy ári jeldiń jyldamdyǵy sekýndyna 15-20 metrge deıin jetýi áser etti.
Sonyń saldarynan 13-16 shilde aralyǵynda oblystyń alty aýdany men Oral qalasyn qamtyǵan iri tabıǵı órtter boldy.
Atap aıtqanda, Aqjaıyq aýdanynda 9917 ga dalalyq jer men 138 ga orman otqa orandy.
Báıterek aýdanynda 10 ga egistik, 652 ga dalalyq jer, 18 ga orman jalynǵa sharpyldy.
Bórli aýdanynda 4680 ga, Qaratóbede 565 ga, Syrymda 1521 ga, Tasqalada 1940 ga dalalyq jer órtendi.
Oral qalasynda 5 ga orman jandy.
Qatty jeldiń saldarynan Aqjaıyq, Jańaqala, Jánibek aýdandarynda elektr baǵandary men uıaly telefon stansalary qulady. Oralda №20 mekteptiń 50 sharshy metr shatyry sypyrylyp tústi.
«Qazirgi kezde negizgi kúsh (TJ departamentinen 54 adam, 9 tehnıka, orman sharýashylyǵy mekemesinen 30 qyzmetker, 3 tehnıka, erikti órt sóndirý qurylymdarynan 15 adam, 1 tehnıka) Aqjaıyq aýdany Býdarın aýyldyq okrýgindegi órtti aýyzdyqtaýǵa jumyldyrylǵan. Qalǵany sóndirildi», dedi J.Jumashev.
Eske sala keteıik, budan buryn BQO-da ormannan shyqqan órttiń aýylǵa kirip, adamdar evakýatsııalanǵanyn jazǵan bolatynbyz. Qutqarýshylar orman órtin tikushaqpen sóndirdi.
