BQO-da bir jylda 19 densaýlyq saqtaý nysany kúrdeli jóndeldi
ORAL. QazAqparat - Batys Qazaqstan oblysynda ótken jyly 19 densaýlyq saqtaý nysany kúrdeli jóndeldi, dep habarlaıdy «QazAqparat» tilshisi.
Sonyń biri - Terekti aýdandyq ortalyq aýrýhanasy búgin paıdalanýǵa berildi. Onyń ashylý rásimine Májilis depýtattary Záýresh Amanjolova men Baqtııar Máken, oblys ákimi Altaı Kólginov qatysty.
Atalmysh aýrýhana ǵımaratynda qurylys-jóndeý jumystary 2017 jyldyń shilde aıynda bastalǵan. Oǵan oblystyq bıýdjetten 480 mln jýyq teńge jumsaldy.
Oblys basshysynyń atap ótkenindeı, óńirde Elbasy tapsyrmasyna sáıkes barlyq salada tıisti jumystar atqarylýda. Ótken jyl Terekti aýdany úshin de jemisti bolyp, aýyldarǵa gaz, sý qubyry tartylyp, joldar men mektepter jóndeýden ótti.
Densaýlyq saqtaý salasynda oblysta sońǵy eki jylda jedel járdem qyzmetiniń 80 kóligi satyp alyndy. Qazir oblys ortalyǵy mundaı kóliktermen tolyq qamtyldy. Endi aýdandardy da qamtamasyz etý josparlanýda. Sol sekildi bilikti maman daıarlaý máselesine de erekshe nazar aýdarylýda. Bıyl jergilikti bıýdjet esebinen 24 mektep túleginiń medıtsınalyq JOO-daǵy oqý aqysy tólenýde. Olar kelgennen keıin óńirdegi medıtsınalyq mekemelerde qyzmet etetin bolady. Mysaly, ótken jyly oblysqa 84 jas maman kelse, sonyń 42-si aýdandarǵa jiberildi. Sondaı-aq Elbasynyń ekonomıkanyń barlyq salasyn tsıfrlandyrý boıynsha bergen tapsyrmalaryn oryndaý maqsatynda da aýqymdy sharalar atqarylýda.
Sapar barysynda Májilis depýtaty Z.Amanjolova aýdandyq aýrýhana qyzmetkerlerimen kezdesip, óziniń dárigerlik tájirıbesimen bólisti. 
Aıta ketý kerek, aýdandyq aýrýhana ǵımaraty 33 jyldan beri jóndeý kórmegen. Ótken jyly oblys ákiminiń aýyl turǵyndarymen kezdesýi kezinde aqsaqaldar osy aýrýhanany jóndeý máselesin kótergen edi.
