BQO-da bir jylda 11533 jańa jumys orny ashyldy
ORAL. QazAqparat - Batys Qazaqstan oblysynda 2016 jyly 11533 jańa jumys orny, sonyń 6639-y nemese 57,6 paıyzy aýyldyq jerde ashyldy, dep habarlaıdy «QazAqparat» HAA tilshisi.
BQO ákimdiginen túsken málimetke qaraǵanda, sonyń 5738-i nemese 49,8 paıyzy - turaqty jumys oryndary. Jyl ishinde 12586 adam eńbek ornyn tapsa, sonyń 9008-i jumyspen qamtý bólimderi arqyly, 3578-i «Jumyspen qamtýdyń jol kartasy - 2020» baǵdarlamasy boıynsha jáne 4927 adam shaǵyn jáne orta kásipkerlikke ornalasty. Aqysy tólenetin qoǵamdyq jumystarǵa 6328 adam jiberildi.
«Jumyspen qamtýdyń jol kartasy - 2020» baǵdarlamasyna sáıkes ótken jyly 5 mlrd. 56,1 mln. teńge bólindi. Baǵdarlamanyń birinshi baǵyty boıynsha 3 mlrd. 667,0 mln. teńgege 200-den astam áleýmettik nysan jóndeldi. Sonyń nátıjesinde aýyldyq jerlerde kópten qolǵa alynbaǵan nysandar qaıta túledi. Mysaly, Chapaev aýylynda ornalasqan, 42 myńnan astam adamǵa qyzmet etetin Aqjaıyq aýdandyq aýrýhanasy 1972 jyly salynǵannan beri jóndeý kórmegen eken. Osy mańyzdy nysanǵa ótken jyly kúrdeli jóndeý júrgizilip, qaıtadan paıdalanýǵa berildi. Sol sekildi Qaztalov aýdanyndaǵy Nursaı aýylynda 30 jyl buryn salynǵan bilim ordasy, Terekti aýdanynda irgesi qalanǵanyna 49 jyl bolǵan Prırechnyı orta mektebi jóninde de osyny aıtýǵa bolady. Sondaı-aq óńirde 28 mádenıet nysany jóndeldi. Qurylys, jóndeý jumystarynyń qolǵa alynýyna baılanysty 2307 jumys orny ashylyp, jumyspen qamtý ortalyqtary arqyly 1162 adam ornalasty. Baǵdarlamanyń ekinshi baǵyty boıynsha 932,4 mln. teńge qarastyrylyp, 307 adamǵa shaǵyn nesıe esebinde 919,0 mln. teńge, 289 adamdy kásipkerlik negizderine oqytýǵa 13,4 mln. teńge bólindi. 2016 jyldyń 1 jeltoqsanyna deıin 330 adam 848,0 mln. teńge shaǵyn nesıe aldy. 2013-2014 jyldary alynyp, qaıtarylǵan nesıe qarajaty esebinen 26 adam 57,6 mln. teńge shaǵyn nesıege qol jetkizdi. Baǵdarlamanyń úshinshi baǵyty boıynsha 1059 adamdy oqytýǵa 214,0 mln. teńge bólindi. Sol sekildi jastar tájirıbesin uıymdastyryp, 459 jas mamandy memlekettik qoldaý úshin respýblıkalyq bıýdjetten 105,1 mln. teńge qaraldy. Ótken jyldyń on bir aıynyń ózinde 603 adam jastar tájirıbesine jiberildi.
Elbasy tapsyrmasyna sáıkes halyqty jumyspen qamtý sharalary jańa jylda da jalǵasyn tabady.
