BQO-da bir kúnde jol apatynan úsh adam qaza tapty
ORAL. QazAqparat – Batys Qazaqstan oblysynda bir kúnde jol apatynan úsh adam qaza tapty, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń aıtýynsha, keshe alǵashqy qar túsip, qolaısyz aýa raıy saldarynan jol-kólik oqıǵalary kóbeıdi.
Aqjaıyq aýdany Taıpaq aýyly mańynda saǵat 06.15 shamasynda 30 jastaǵy júrgizýshi «Aýdı» avtokóliginiń rýline ıe bola almaı, aýdarylyp qaldy. Sonyń saldarynan osy kólikte bolǵan 30 jastaǵy eki adam kóz jumdy. Jaraqat alǵan júrgizýshi aýdandyq aýrýhanaǵa jatqyzyldy.
Qazirgi kezde QR QK 345-baby 4-bóligine sáıkes tergeý amaldary júrgizilýde.
Sol sııaqty 11 qarasha kúni keshkisin Oralda saǵat 21.15-te 57 jastaǵy júrgizýshi aıdaǵan «Lada Kalına» avtokóligi «Kýbleı» JShS tusyndaǵy aınalma jolda júk kóligimen soqtyǵysty. Jeńil kóliktiń júrgizýshisi jedel járdem kelgenshe qaıtys boldy.
Bul oqıǵa boıynsha QR QK 345-baby 3-bóligine sáıkes qylmystyq is tergelýde.
Bir kúnniń ishinde qala aýmaǵynda 19 jol-kólik oqıǵasy tirkelip, 1 adam qaıtyp, ekeýi jaraqat aldy.
Jyl basynan beri oblys aýmaǵynda 247 oqıǵa saldarynan 57 adam mert bolyp, 298-i túrli jaraqat aldy.
Eske sala keteıik, budan buryn Oralda úsh avtokólik soqtyǵysyp, eki adamnyń zardap shekkenin jazǵan bolatynbyz.
