BQO-da bir kúnde zańsyz balyq tasymalymen úsh avtokólik ustaldy
ORAL. QazAqparat - Batys Qazaqstan oblysynda bir kúnde zańsyz balyq tasymalymen úsh avtokólik ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, «Bekire-2019» jedel aldyn alý sharasy barysynda keshe úsh birdeı qylmysqa tosqaýyl qoıyldy.
Saǵat 06.00-de Oral-Atyraý joly boıyndaǵy «Kóshim» beketinde Aqjaıyq aýdanynyń 1992 jylǵy turǵyny aıdap kele jatqan «Seat Alhambra» avtokóligi toqtatyldy. Onda júrgizýshiniń 512 kg qara balyqty tasymaldap kele jatqany belgili boldy.
Keshe sondaı-aq saǵat 14.25-ter shamasynda Barbastaý-Inder joly boıynda, Terekti aýdany Shaǵataı aýyly tusynda Aqjaıyq aýdanynyń 1992 jáne 1986 jylǵy eki turǵyny otyrǵan «Folksvagen Sharan» avtokóligi kidirtildi. Kólikti qaraǵan kezde 16 qapqa salynǵan 800 kg túrli balyq tabyldy.
Saǵat 11.05-ter shamasynda Oral-Podstepnyı joly boıyndaǵy «Shep» beketinde Terekti aýdanynyń 1964 jylǵy turǵyny júrgizip kele jatqan «GAZel» avtokóliginen 2 tonnadan astam qara balyq shyqty.
Úsh kólikte de tıisti qujattar bolmady.
Qazirgi kezde atalǵan derekter boıynsha QR QK 196-baby 1-bóligine sáıkes (kórineý qylmystyq jolmen tabylǵan múlikti ıemdený nemese ótkizý) sotqa deıingi tergeý amaldary júrgizilýde.
Eske sala keteıik, budan buryn BQO-da 3,5 tonna balyq tasymaldaǵan avtokólik ustalǵanyn jazǵan bolatynbyz.
