BQO-da bir kúnde eki turǵyn úı órtendi
ORAL. QazAqparat – Batys Qazaqstan oblysynda bir kúnde qos birdeı turǵyn úı órtendi, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, bul úılerdiń ekeýinde de gaz ballondarynyń jarylý qaýpi boldy.
Keshe saǵat 17.58-de Oralda Mahambet aqyn kóshesi 6-úı 3-páterde órt shyqty.
Úıdiń tóbesi men jeke zattar jandy. Aýmaǵy 15 sharshy metrdi qamtyǵan órt ornynan 3 gaz ballony shyǵaryldy.
10 adam, 3 tehnıkanyń qatysýymen «tilsiz jaý» saǵat 19.02-de aýyzdyqtaldy.
Sondaı-aq saǵat 21.50-de Terekti aýdany Prırechnyı aýyly Naberejnaıa kóshesi 12-úıdiń órtengeni jóninde habar tústi. Úıdiń tóbesi men aǵash jaqtaýlary janyp, aýmaǵy 36 sharshy metrdi qamtydy.
Órt sóndirýshiler bul úıden de bir gaz ballonyn alyp shyqty.
Órt (5 adam, 1 tehnıka) búgin saǵat 00.20-da sóndirildi.
Qazirgi kezde órttiń shyǵý sebebi, kináli adamdar, keltirilgen shyǵyn anyqtalý ústinde.
BQO TJ departamenti gaz ballondarynan keletin qaýiptiń qys kúnderinde arta túsetindigin, sondyqtan saqtyq sharalaryn ustanýdyń qajettigin eskertedi.
