BQO-da bir kúnde eki adam sýǵa ketti
ORAL. QazAqparat - Batys Qazaqstan oblysynda bir kúnde eki adam sýǵa ketti, dep habarlaıdy QazAqparat tilshisi.
BQO TJ departamentinen túsken málimetke qaraǵanda, qos qaıǵyly oqıǵa da 15 tamyz kúni oryn aldy.
Keshe 1994 jylǵy jas jigit saǵat 15.10-da Jelaev kenti aýdanynda jasandy sý qoımasyna shomylýǵa bolmaıtyn jerden túsip, batyp ketken. Jedel qutqarý jasaǵynyń 3 qyzmetkeri 1 tehnıka, 1 júzý quralynyń kómegimen marqumnyń denesin 16.41-de sýdan shyǵardy.
Sol kúni Terekti aýdany Satymshegen aýyly mańyndaǵy jasandy sý qoımasynda saǵat 16.00-de 1999 jylǵy taǵy bir jas adam batyp ketti. Ol da shomylýǵa ruqsat etilmegen jerden túsken. Marqumnyń denesin tórt aýyl turǵyny taýyp, saǵat 19.00-de shyǵardy.
Osylaısha bir kúnniń ishinde eki birdeı jas ǵumyr úzildi.
Oblysta sońǵy on jylda 270-ten astam adam sýǵa batyp ketse, sonyń 70-teıi - balalar.
Eske sala keteıik, keshe Shalqar kólinde tórt adamnyń qutqarylǵanyn jazǵan bolatynbyz.
