BQO-da bir kúnde 3 adam óndiristik jaraqat alyp, bireýi qaza tapty
ORAL. QazAqparat – Batys Qazaqstan oblysynda bir kúnde úsh adam óndiristik jaraqat alyp, bireýi qaza tapty, dep habarlaıdy QazAqparat tilshisi.
BQO densaýlyq saqtaý basqarmasynyń baspasóz qyzmeti málim etkenindeı, qaıǵyly oqıǵa keshe qalaǵa jaqyn ornalasqan Terekti aýdany Toqpaı aýylynda boldy.
Saǵat 15.52-de «Qaz-Hol» kompanııasy salyp jatqan turǵyn úıde tas qalaýshy bolyp jumys istegen 47 jastaǵy er adam qulap, basynan jaraqat alǵan. Ol es-tússiz kúıde oblystyq kópbeıindi aýrýhanaǵa apara jatqan kezde jedel járdem kóliginde kóz jumdy.
Taǵy bir oqıǵa Oral qalasynda Petrovskıı kóshesi 105-mekenjaıynda boldy. Saǵat 11.54-te 48 jastaǵy jumysshy bıiktigi 3 metr tóbeden qulaǵan. Basy men omyrtqasynan jaraqat alǵan er adam oblystyq kópbeıindi aýrýhananyń hırýrgııalyq bólimshesine jetkizildi.
«Jáńgir han» saýda úıinde beınebaqylaý júıesinde operator bolyp jasaıtyn 29 jastaǵy áıel saǵat 23.00-de qulap, shúıdesin soǵyp alǵan. Ol da oblystyq aýrýhananyń jaraqat pýnktine jetkizildi.
Eske sala keteıik, budan buryn Oralda vagonnan qulaǵan jumysshy mert bolǵanyn jazǵan edik.
