BQO-da bir aptanyń ishinde 1500-ge jýyq júrgizýshi shekaradan ótti
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń oblystyq jedel shtab otyrysynda málim etkenindeı, sonyń ishinde 1044 adamnyń COVID-19-ge anyqtamasy bolǵan.
Anyqtamasy joq 114 adam eki kúnge karantındik statsıonarǵa jatqyzylyp, synama alynǵan kezde Túrkistan oblysynyń úsh azamatynan koronavırýs anyqtaldy.
Anyqtamasy joq 19 sheteldik azamat keri qaıtaryldy.
Sondaı-aq osy kezeńde shekaradan 1482 júrgizýshi ótti. Sonyń 889-ynyń anyqtamasy bolǵan joq. Solardyń ishinen reseılik 2, batysqazaqstandyq 6 azamattan indet tabyldy. Oǵan qosa 2323 tranzıttik júrgizýshiniń 19-yna kirýge ruqsat berilgen joq.
M.Aryspaevtyń sózine qaraǵanda, oblysta epıdemıologııalyq jaǵdaı turaqsyz bolyp otyr.
Óńirde qazan aıynda 161 adamnyń koronavırýs juqtyrǵany tirkeldi.
Tek sońǵy aptada 71 adamnan COVID-19 anyqtaldy. Sonyń ishinde 34-inen (47,9 paıyzy) aýrýhanaǵa jatar aldynda, 17-sinen (23,9 paıyzy) qarym-qatynasta bolǵandardy teksergen kezde, 12-sinen (16,9 paıyzy) jumysqa barý jáne memlekettik shekaradan ótý úshin profılaktıkalyq maqsatta synama alynǵan ýaqytta, 8-inen (11,3 paıyzy) medıtsınalyq mekemege júgingen sátte indet juqtyrǵany belgili boldy.
Іndet juqtyrǵandardyń 40,8 paıyzy (29 adam) – zeınetkerler, 19,7 paıyzy (14) – jumys isteıtinder, 14,1 paıyzy (10) – jumyssyzdar, 9,9 paıyzy (7) – medıtsına qyzmetkerleri, 9,9 paıyzy (7) – oqýshylar, 4,2 paıyzy (3) – muǵalimder, 1,4 paıyzy (1) – balabaqsha tárbıelenýshisi.
«Oblysta qazirgi tańda 7 vırýsologııalyq zerthana jumys isteýde. Qazan aıy bastalǵannan beri júrgizilgen zertteýler sany 31,7 paıyzǵa kóbeıdi. Kúni búgin oblys PTR dıagnostıkasy úshin 36784 zertteýge arnalǵan 734,7 test-júıesimen qamtamasyz etilgen», dedi M.Aryspaev.
Eske sala keteıik, budan buryn BQO-da toı jasaǵan aýyl ákiminiń qyzmetinen bosatylatynyn jazǵan bolatynbyz.