BQO-da BIM-tehnologııalar salasynda fın tájirıbesin qoldaný kózdelýde

  ORAL. QazAqparat  - Batys Qazaqstan oblysynda BIM-tehnologııalar salasynda fın tájirıbesin qoldaný kózdelýde. Bul týraly oblys ákimi Altaı Kólginovtiń «Collaprime Oy» fın kompanııasynyń bas dırektory Tonı Lındkvıstpen kezdesýinde aıtyldy, dep habarlaıdy QazAqparat tilshisi.

Yntymaqtastyq máseleleri talqylanǵan júzdesýde kásiptik bilim berýde oqytý modýlderin engizý, 3D tsıfrlyq jobalaý salasyndaǵy mamandardy daıarlaý, sondaı-aq BIM-tehnologııalar, 3D-modeldeý salasynda fın tájirıbesimen almasý týraly kelisimge qol jetkizildi.

«Collaprime» halyqaralyq syılyqtardyń ıegeri jáne 2016 jyly BIM-tehnologııalary boıynsha (zııatkerlik 3D-modelder paıdalaný negizinde ǵımarattardy aqparattyq modeldeý) Fınlıandııanyń eń úzdik kompanııasy bolyp tabylady.

Arhıtektýralyq bólshekterdi, ınjenerlik júıelerdi jáne qurylys konstrýktsııalaryn jobalaý boıynsha mamandar osy tehnologııalardy ǵımarattar men ınfraqurylym nysandaryn josparlaý, jobalaý, salý jáne paıdalaný kezinde tıimdi qoldana alady.

«Fınlıandııanyń BIM-tehnologııalardy tolyqqandy paıdalaný kezeńi 30 jylǵa sozylsa, Qazaqstan úsh jyldyń ishinde, ıaǵnı 2020 jylǵa qaraı ótýdi josparlap otyr. Bizdiń ózara áriptestigimiz Qazaqstannyń túrli salalaryna BIM-tehnologııalardy sátti engizýge septesedi», - dedi Tonı Lındkvıst.