BQO-da bylapyt sóz aıtqan memlekettik qyzmetshi qatań sógis aldy

ORAL. KAZINFORM — QR Memlekettik qyzmet isteri jónindegi agenttigi BQO-daǵy ádep keńesiniń otyrysynda memlekettik qyzmetshilerdiń tártiptik isteri qaraldy.

Báıterek aýdany sáýlet, qala qurylysy jáne qurylys bóliminiń basshysy Artýr Baıahatov óziniń qabyldaýyna kelgen azamatpen sóılesip otyryp, balaǵat sóz aıtýǵa jol bergen. 

Bul sátti atalǵan turǵyn beınetaspaǵa túsirip alyp, shaǵymdanǵan.

A.Baıahatov bylapyt sóz aıtqanyn moıyndap, keshirim surady. Ol mundaı qadamǵa bólimde jumystyń kóptigimen baılanysty barǵandyǵyn alǵa tartty.

Departament basshysy, ádep jónindegi keńes tóraǵasy Murat Baısalov atalǵan bólimde shynynda da birneshe jumys ornynyń bos turǵanyn, alaıda bul Ádep kodeksiniń talaptaryn buzýǵa negiz emestigin jetkizdi.

Keńes músheleri A.Baıahatovty qatań sógis túrindegi tártiptik jaýapkershilikke tartý týraly usynyspen kelisti.

Sol sekildi Bórli aýdany Pýgachev aýyldyq okrýginiń ákimi Mereke Іzteleýov osyndaı qylyqqa jol bergen. 

QR Memlekettik qyzmet isteri jónindegi agenttigi BQO boıynsha departamentiniń bas mamany Móldir Serikovanyń málim etkenindeı, oqıǵa bylaısha órbigen. Atalǵan aýyldyq okrýg ákimi apparatynyń qyzmetkeri nesıe alyp, ony tólemegendigi jóninde habarlama túsken. Budan keıin aýyl ákimi ony izdep, áýeli anasyna, sosyn ápkesine baılanysqa shyqqan. Sol kezde «pochtı kak aferıst» degen sózdi aıtyp qalyp, keıin sonysy úshin keshirim suraǵan. 

Ádep jónindegi keńes M.Іzteleýovti eskertý túrindegi tártiptik jazaǵa tartýdy jón dep tapty.
Osylaısha, óńirde jyl basynan beri 18 memlekettik qyzmetshi tártiptik jaýapkershilikke tartyldy.

Eske sala keteıik, budan buryn BQO-da balaǵat sóz aıtqan aýyl ákiminiń tártiptik jaýapkershilikke tartylǵanyn jazǵan edik.

Sondaı-aq BQO-da 42 laýazymdy qyzmetkerge 3,3 mln teńge ákimshilik aıyppul salyndy.