BQO-da Bykovka ózenindegi sý deńgeıi bir táýlikte 110 santımetrge kóterildi
ORAL. KAZINFORM – Batys Qazaqstan oblysynda Jaıyq ózenindegi sý deńgeıi Bórli aýdany Jarsýat aýylynda 308 santımetrge jetti (táýliktik ósimi – 13 sm, qaýipti shegi – 1 000 sm).
«Qazgıdromet» RMK BQO fılıalynyń dırektory Tilegen Shapanovtyń málim etkenindeı, Jaıyq ózeni Oral qalasyndaǵy gıdrobekette 134 (+2), Báıterek aýdany Kóshim aýyly tusynda 192 santımetrdi (+13, ekeýiniń de qaýipti shegi – 850 sm) kórsetti.
Sondaı-aq Shaǵan ózeninde Báıterek aýdany Chývashın aýylynda 641 (+121, qaýipti shegi – 1 300 sm), Mıchýrınde 344 (+81, 1 100 sm) santımetr boldy.
Derkól ózeninde Báıterek aýdany Beles aýyly tusynda kóterilý deńgeıi joǵary – 406 (+87, 700 sm) santımetr.
– Báıterek aýdanynda shaǵyn ózenderdiń kúrt kóterilip jatqany baıqalady. Atap aıtqanda, Bykovka ózenindegi sý deńgeıi 778 sm (+110) bolyp, qaýipti shekke (810 sm) jaqyndady. Sol sekildi Rýbejka ózeni osy attas aýylda 342 santımetrdi (+69, 850 sm) kórsetti, - dedi T.Shapanov.
Fılıal málimetine qaraǵanda, Orynbor oblysyndaǵy Irekli qoımasynan Jaıyq ózenine qazirgi kezde sekýndyna 60 tekshe metr sý jiberilýde. Buǵan deıin sekýndyna 139 tekshe metr sý bosatylǵan edi.
Eske sala keteıik, budan buryn BQO-da Shaǵan jáne Derkól ózenderinde sý deńgeıi kóterilip jatqanyn jazǵan edik.
