BQO-da bıyl 3 aıda 135 órt oqıǵasy tirkeldi

ORAL. KAZINFORM – Batys Qazaqstan oblysynda bıyl bastapqy úsh aıda 135 órt oqıǵasy tirkelip, tilsiz jaýdan 1 adam qaza tapty. 

Óńirlik kommýnıkatsııalar qyzmeti alańynda ótken brıfıngide BQO TJ departamenti memlekettik órt baqylaý basqarmasynyń basshysy Mereke Jumaǵalıev órt kezinde 1 adam túrli dárejedegi dene jaraqatyn alǵanyn aıtty. Sondaı-aq ol órtten kelgen shyǵyn 21 mln 280 myń teńgeden asqanyn atap ótti. 

Byltyr osy kezeńmen salystyrǵanda, órt sany 2,8 paıyzǵa (139-dan 135-ke), jaraqat alǵandar 4 derekke (5-ten 1-ge) azaıǵan. Turǵyn úı sektorynda 70 órt bolyp, 2024 jylǵydan (76) 7,9 paıyzǵa kemidi. 

— Ekologııa jáne tabıǵı resýrstar mınıstrliginiń buıryǵyna sáıkes oblys aýmaǵyndaǵy memlekettik orman qorynyń jerlerinde órttiń qaýipti maýsymy 14 sáýirden bastalady. Alaıda búginge deıin óńirde dalada aýmaǵy 147 gektardy qamtyǵan 13 janý oqıǵasy boldy. Departament jergilikti atqarýshy jáne múddeli memlekettik organdarmen birlesip aldaǵy qaýipti merzimde órtterdiń aldyn alýǵa baǵyttalǵan is-sharalar keshenin júrgizip jatyr, - dedi M.Jumaǵalıev. 

Onyń aıtýynsha, departament jasaǵynda 186 tehnıka bar. Oǵan qosymsha 9 tehnıka jeke quramdy órt ornyna jedel jetkizedi. Órt sóndirýge tartylǵan kúshtermen radıobaılanys ornatý úshin komandalyq-shtabtyq mashına paıdalanylady. Ol barlyq iri tabıǵı órtke tartylady. 

Oblysta 182 eldi mekende jergilikti atqarýshy organdar qurǵan 37 órt sóndirý beketi bolsa, sonyń tórteýi jyl boıyna, qalǵany maýsymdyq qyzmet atqarady. 

— Reıdtik is-sharalardy ótkizý maqsatynda oblys boıynsha quramynda 84 adam bar 15 mobıldi top quryldy. Kúni búgin 22 reıd ótkizilip, órt qaýipsizdigi talaptaryn buzǵan 28 adam 589 800 teńge kóleminde ákimshilik jaýapkershilikke tartyldy, - dedi BQO TJ departamenti memlekettik órt baqylaý basqarmasynyń basshysy.

Eske sala keteıik, budan buryn Oralda kópqabatty úıde órt shyǵyp, 17 jastaǵy qyzdyń ýlanyp qalǵanyn jazǵan edik.