BQO-da bes kúnde otbasylyq sharalardy jasaǵandarǵa 13 mln teńge aıyppul salyndy

ORAL. QazAqparat – Batys Qazaqstan oblysynda qarasha aıynyń alǵashqy bes kúninde otbasylyq sharalardy jasaǵan turǵyndarǵa 13 mln 84,580 myń teńge aıyppul salyndy. Bul týraly oblys ákimi Ǵalı Esqalıevtiń tóraǵalyq etýimen ótken oblystyq jedel shtab otyrysynda aıtyldy, dep habarlaıdy QazAqparat tilshisi.

BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń málim etkenindeı, indettiń órshýine adamdardyń sanıtarlyq talaptardy saqtamaýy sebep bolýda.

Monıtorıngtik toptar júrgizip jatqan túsinik jumystaryna qaramastan, sadaqa, toı ótkizý tyıylmaı otyr.

Onyń sózine qaraǵanda, oblysta 1-5 qarasha aralyǵynda 118 adamnyń indet juqtyrǵany tirkeldi. Sonyń ishinde búgin 49 adamnan anyqtalǵan. Qyrkúıekte – 111, qazanda 161 adam aýyrǵan bolatyn. Sońǵy bes kúnde 38 zeınetker, 9 oqýshy jáne 4 muǵalimniń koronavırýs juqtyrǵany belgili boldy.

Іndettiń óse túsýine baılanysty oblystyń bas memlekettik sanıtar dárigeri 9 qarashadan bastap 14 kúnge qalaǵa kireberiske qaıtadan blokpostar qoıý, demalys kúnderi qoǵamdyq kólik qozǵalysyn shekteý, qoǵamdyq tamaqtandyrý oryndarynyń qyzmetin toqtatý, qyzmetkerlerdiń 80 paıyzyna deıin qashyqtan jumys isteýge jiberý jáne basqa qosymsha shekteý sharalaryn engizýdi usyndy.

M.Aryspaevtyń bul usynysy oblystyq jedel shtab otyrysynda qaralyp, tıisti sheshim qabyldanatyn bolady.

Eske sala keteıik, budan buryn Oralda túnde kólikterdiń júrýine shekteý qoıylatynyn jazǵan bolatynbyz.