BQO-da bes birdeı mektep boı kótermek
ORAL. QazAqparat - Batys Qazaqstan oblysynda aldaǵy jyly bes birdeı mektep boı kótermek. Bul týraly Dostyq úıinde «Jańartylǵan bilim mazmuny: búgini men bolashaǵy» degen taqyrypta ótken bilim berý salasy qyzmetkerleriniń bıylǵy qorytyndy jıynynda oblys ákimi Altaı Kólginov málim etti, dep habarlaıdy «QazAqparat» tilshisi.
Sala qyzmetkerlerin QR Táýelsizdiginiń 25 jyldyǵymen jáne jańa jyl merekesimen quttyqtaǵan óńir basshysynyń atap ótkenindeı, táýelsizdik jyldarynda Elbasy tapsyrmasyna sáıkes jas urpaqqa bilim berý isine basa kóńil bólinip, jańa reformalar qolǵa alyndy. Elimiz egemendik alǵannan keıingi merzimde tek Batys Qazaqstan oblysynyń ózinde 60 mektep salyndy. Bıyl óńirde 17 bilim nysany kúrdeli jóndelse, taǵy bir mektep jańadan turǵyzyldy. «Nurly jol» baǵdarlamasyna sáıkes Shyńǵyrlaý aýdanynda 290 oryndyq «Bolashaq» balabaqshasy paıdalanýǵa berildi. Bıyl halyq sanynyń kóbeıýine baılanysty Oral qalasynda qos mektep qurylysy bastalsa, taǵy ekeýi kelesi jyly salynbaq. Zelenov aýdany Darııan aýylyndaǵy bilim oshaǵyn qosqanda, aldaǵy jyly óńirde bes birdeı mektep iske qosylmaqshy. Árıne, bilim berý salasynyń máseleleri mektep salýmen shektelmeıdi. Sondyqtan toqsan saıyn sala qyzmetkerlerimen kezdesip, keleli jaıttardy birlesip sheshý jóninde kelisilgen bolatyn. Bul jolǵy talqyǵa túsip otyrǵan 12 jyldyq bilim berýge birtindep kóshý, bilim mazmunyn zamanaýı talaptarǵa saı jańartý máselesi de sondaı mańyzdy.
Oblystyq bilim basqarmasynyń basshysy Aıgúl Myńbaevanyń aıtýynsha, 2015-2016 oqý jyly bastaýysh bilimniń memlekettik jalpyǵa mindetti bilim berý standarty men oqý baǵdarlamasyn baıqaýdan ótkizetin respýblıka boıynsha 30 bilim ordasy belgilense, sonyń ishinde BQO-dan Oral qalasyndaǵy M.Yqsanov atyndaǵy №36 jáne Terekti aýdanyndaǵy Shaǵan orta mektebi bar edi. Osy mektepterde ótken oqý jylynda 146 shákirt synaqtan sátti ótip, qazir olar 2-synypta sabaqtaryn jalǵastyrýda. Sol sekildi bıylǵy 1 qyrkúıekten bastap elimizdiń barlyq bilim ordasynda Nazarbaev zııatkerlik mektebiniń tájirıbesi negizinde 1-synyptarǵa jańartylǵan bilim berý mazmuny engizildi. Jańartylǵan bilim berý mazmuny aıasynda biliktilikti arttyrý kýrstarymen 2,5 myńnan astam muǵalim qamtyldy. Atalǵan eki mekteptiń is-tájirıbesin taratý jumystary qolǵa alyndy. Mine, búgingi jıynda ustazdar osy máseleler jóninde óz usynys-pikirlerin ortaǵa salyp, tájirıbelerimen bólisti.
Shara sońynda jańa jobany júzege asyrýǵa belsene qatysqan sala qyzmetkerleri QR Bilim jáne ǵylym mınıstrligi Y.Altynsarın atyndaǵy Ulttyq bilim akademııasy men oblys ákiminiń alǵyshattarymen, sondaı-aq oblystyq bilim basqarmasynyń qurmet gramotalarymen marapattaldy.
