BQO-da bes adam ormanda adasyp ketti
ORAL. QazAqparat - Batys Qazaqstan oblysynda bes adam, sonyń ishinde eki júkti áıel ormanda adasyp ketti, dep habarlaıdy QazAqparat tilshisi.
BQO TJ departamenti jedel qutqarý jasaǵynyń bas qutqarýshysy Aıagóz Qojanbaevanyń aıtýynsha, 28 maýsym kúni Oral qalasyna qarasty Serebrıakov kenti mańyndaǵy ormanda bes adamnyń adasyp ketkeni jóninde habar túsken.
Keıin anyqtalǵanyndaı, olar «Lada Prıora» avtokóligimen Oraldan shyǵyp, Jaıyq jaǵasyna bet alǵan. Serebrıakov kentinen 30 shaqyrymdaı júrgennen keıin olar adasqan. Kóp uzamaı kabınasynda eki er adam, qos júkti áıel jáne qyz bolǵan avtokólik synyp qalǵan.
Adasqan adamdardy izdeýge jedel qutqarý jasaǵynyń kezekshi toby shyqty.
Túngi ýaqyt bolǵandyqtan, izdestirý jumystary ońaıǵa túsken joq. Degenmen 1 saǵat 20 mınýttan keıin adamdar tabyldy. Qutqarýshylar avtokólikti otaldyrýǵa kómektesip, kentke deıin shyǵaryp saldy.
