BQO-da Berezov aýylynyń turǵyndaryna arnalǵan 100 úıdiń qurylysy aıaqtaldy
ORAL. QazAqparat - Bórli aýdany Berezov jáne Bestaý aýyldary turǵyndaryna arnalǵan Aqsaı qalasyna irgeles Araltaldaǵy 100 úıdiń qurylysy aıaqtaldy. Sonymen qatar Aqsaı qalasynda 153 páterlik toǵyz qabatty eki úı de kóp uzamaı paıdalanýǵa berilmekshi. Jumys saparymen Bórli aýdanynda bolǵan oblys ákimi Altaı Kólginov qurylys barysymen tanysty, dep habarlaıdy «QazAqparat» tilshisi.
Bórli aýdany ákiminiń orynbasary Qaırat Ótegenovtiń sózine qaraǵanda, Araltal aýylyndaǵy 100 úıdiń 50-i úsh, qalǵan jartysy tórt bólmeli. Kúni búgin úılerdiń qujattary jasalýda. Aldaǵy tamyz aıynyń ortasynan Berezov jáne Bestaý aýylynyń turǵyndary osynda kóshirile bastaıdy. Araltalda boı kótergen 300 oryndyq mektep te jańa oqý jylyna deıin paıdalanýǵa berilmek. Qazirgi tańda segiz shaqyrymdyq jol, trotýarlar salynyp, kósheler jaryqtandyrylýda.
Óńir basshysy atalǵan aýyldar turǵyndary salqyn túskenshe ornalasyp úlgerýi úshin Aqsaı qalasy Qarashyǵanaq shaǵynaýdanyndaǵy qos kóp qabatty turǵyn úıdiń qurylysy qyrkúıek aıynda tolyq ta sapaly aıaqtalýy kerektigin jetkizdi. Qazirgi kezde kóshetin turǵyndar jumys tobyn quryp, qurylys jumystaryn ózderi qadaǵalaýda. Olardyń balalaryna arnalǵan balabaqsha osyǵan deıin paıdalanýǵa berilse, endi mektep te daıyn bolmaq. Sonda turǵyndar úshin barlyq jaǵdaı jasalady.
Eske sala keteıik, 2014 jylǵy 28 qarashada balalar jappaı gazdan ýlanǵan oqıǵadan keıin Úkimet qaýlysyna sáıkes kóshirýdiń birinshi kezeńinde 82 (Berezovtan 75, Bestaýdan 7) otbasy, barlyǵy 416 adam Aqsaı qalasynyń 5-shaǵynaýdanynda salynǵan 80 jáne 75 páterlik úılerge kóshirilgen bolatyn.
