BQO-da bekire tuqymdas balyqty satýmen aınalysqan qylmystyq top ustaldy
ORAL. QazAqparat - Batys Qazaqstan oblysynda bekire tuqymdas balyqtar men onyń ýyldyryǵyn zańsyz alyp, satýmen jáne tasymaldaýmen aınalysqan qylmystyq top qolǵa tústi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, júrgizilgen sharalar nátıjesinde uıymdasqan toptan 2 tonnadan astam bekire tuqymdas balyq, túrli balyqtan alynǵan 113 kg ýyldyryq jáne basqa zattaı aıǵaqtar tárkilengen.
«Qazirgi kezde departamenttiń tergeý basqarmasy QR QK 339-baby (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) jáne 262-babyna (uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý) sáıkes sotqa deıingi tergeý amaldaryn júrgizýde», dep habarlady polıtsııa departamentiniń baspasóz qyzmeti.
