BQO-da bekire aýlap, sottalǵandardan 10,9 mln teńge óndirildi
ORAL. QazAqparat – Batys Qazaqstan oblysynda bekire tuqymdas balyqtardy zańsyz aýlaǵandar sottaldy, dep habarlaıdy QazAqparat tilshisi.
Oblys prokýratýrasynyń baspasóz qyzmetinen túsken málimetke qaraǵanda, aýmaqtyq ınspektsııa men polıtsııa qyzmetkerleri Aqjaıyq aýdanynda Jaıyq ózeninen jalpy salmaǵy 20,4 kg 25 bekire balyǵyn aýlaǵan 12 adamdy ustaǵan edi.
Aqjaıyq aýdany prokýratýrasy sotqa deıingi tergep-tekserýde zańdylyqtyń saqtalýyn qamtamasyz etti.
Almaly, Aqbulaq, Janama, Qaraýyltóbe jáne Shabdarjap aýyldarynyń turǵyndary aý quraldaryn paıdalanyp, «Janýarlar dúnıesin qorǵaý, ósimin molaıtý jáne paıdalaný týraly» zańnyń 39-babynyń ózenderde bekire balyqtaryn aýlaýǵa tyıym salý týraly talaptaryn buzǵan.
Aqjaıyq aýdandyq sotynyń úkimimen atalǵan adamdar QR QK 335-baby 3, 4-bóligine sáıkes aıypty dep tanylyp, olarǵa 1 jyldan 2 jylǵa deıin bas bostandyǵyn shekteý, shartty túrdegi jaza jáne 200 saǵat qoǵamdyq jumys túrindegi jazalar belgilendi.
Sottalǵandardan barlyǵy 10,9 mln teńge materıaldyq shyǵyn óndirilip, alynǵan balyqtar men kólik quraldary memleket paıdasyna tárkilendi. Al aý, shana, kúrek jáne basqa zattar qylmys quraly retinde joıyldy.
Sot aktileri zańdy kúshine endi.
